काठमाडौं । दसैँमा घर जाने यात्रुका लागि सरकारले आजदेखि अग्रिम बस टिकट बुकिङ खुला गरेको छ । टिकट पाउने आशमा यात्रुहरू गएरातिदेखि नै काठमाडौंको नयाँ बसपार्कस्थित टिकट काउन्टर अगाडि लाइनमा बसेका थिए ।
यातायात व्यवस्था विभाग, नेपाल प्रहरी, यातायात व्यवसायी तथा मजदुरबीच असोज २० गते मंगलबार विभागमा बसेको बैठकले असोज २३ गतेदेखि दसैँका लागि अग्रिम टिकट बुकिङ खुला गर्ने निर्णय गरेको थियो ।
केही जिल्लामा जाने यात्रु भने टिकट लिन बिहीबार रातिदेखि नै लाइनमा बसेका थिए । नयाँ बसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पंकज मल्लका अनुसार सुदूरपश्चिमका विभिन्न जिल्लामा जाने यात्रु बिहीबार राति ९ बजेदेखि नै टिकट काउन्टर अगाडि लाइनमा बसेका थिए ।
दसैँका लागि अग्रिम टिकट बुकिङ गर्ने यात्रुको चापलाई ध्यानमा राख्दै लोत्से बहुउद्देश्यीय प्रालिले नयाँ बसपार्क क्षेत्रमा थप १५ वटा टिकट काउन्टर सञ्चालनमा ल्याएको जनाएको छ । यात्रुको सहजताका लागि आवश्यक सुरक्षा प्रबन्धसमेत मिलाइएको कम्पनीले जनाएको छ ।
प्रतिक्रिया