काठमाडौं । भुटानको शिंताफू हिमतालबाट अचानक ठूलो परिमाणमा पानी बाहिरिएपछि आएको बाढीले मुख्य सडकको एक खण्ड बगाएको छ । सडकमा क्षति पुगेपछि दुर्गम लाया क्षेत्र भुटानका अन्य भूभागसँगको सडक सम्पर्कबाट विच्छेद भएको छ ।
उत्तर भुटानको गासा जिल्लामा रहेको शिंताफू तालबाट आएको बाढीको पानी राति करिब ८ः१५ बजे ताक्तसेमाखाङ पुगेको थियो । बाढीले लाया जोखांग सडकको एक खण्डमा क्षति पुर्याएपछि अर्को सूचना जारी नभएसम्मका लागि उक्त सडकमा सबै प्रकारका यातायात बन्द गरिएको छ ।
भुटानी अधिकारीहरूले जोखिमयुक्त क्षेत्रमा खटिएका सुरक्षाकर्मी तथा अन्य व्यक्तिलाई सुरक्षित स्थानमा जान आग्रह गरेका छन् । सम्भावित जोखिमलाई ध्यानमा राख्दै सावधानीका उपाय अपनाइएको छ भने छिमेकी क्षेत्रलाई समेत सतर्क गराइएको छ । घटनामा हालसम्म मानवीय क्षति भएको विवरण प्राप्त भएको छैन ।
रातिको अँध्यारोका कारण तालबाट बाहिरिएको पानीको परिमाण र बाढीले पुर्याएको क्षतिको पूर्ण मूल्यांकन हुन सकेको छैन । प्रारम्भिक विवरणले भने बाढीको प्रभाव ठूलो हुन सक्ने संकेत गरेका छन् ।
यस घटनापछि भारतको पश्चिम बंगालमा पनि सतर्कता बढाइएको छ । वनमन्त्री मनोजकुमार ओरांवले तल्लो तटीय क्षेत्रमा सम्भावित बाढीको जोखिमलाई ध्यानमा राख्दै संकोश नदी किनारका बासिन्दालाई सचेत रहन र आवश्यक परे सुरक्षित स्थानमा जान आग्रह गरेका छन् ।
उनले जोखिमयुक्त क्षेत्रका बासिन्दासँग सम्पर्क गर्न तथा आवश्यक परे उनीहरूलाई सुरक्षित स्थानमा सार्ने व्यवस्था मिलाउन प्रशासन र सम्बन्धित अधिकारीलाई निर्देशन दिएका छन् । पश्चिम बंगालका अधिकारीहरूले नदीको बहाव र सम्भावित जोखिमको निगरानी गरिरहेका छन् ।
प्रतिक्रिया