बुटवल । तिहार नजिकिँदै गर्दा मिठाईको माग र कारोबार बढेको छ । चाडपर्वमा मिठाईको अत्यधिक मागसँगै खाद्य स्वच्छता र गुणस्तरको विषय पनि महत्वपूर्ण बनेको छ ।
यसैबीच खाद्य प्रविधि तथा गुण नियन्त्रण विभागले सार्वजनिक गरेको विवरणमा रुपन्देहीको बुटवलस्थित कस्तुरी मिष्ठान भण्डार देशभरका १७९ मिठाई उत्पादक तथा बिक्री प्रतिष्ठानमध्ये मापदण्ड पूरा गर्ने सूचीमा परेको छ ।
तिहारमा मिठाईको खपत सामान्य दिनको तुलनामा झन्डै ४० गुणासम्म बढ्ने गरेको बताइन्छ । यही अवसरमा बजारमा गुणस्तरहीन तथा अखाद्य मिठाई बिक्री हुने जोखिमलाई ध्यानमा राख्दै विभागले मिठाई उत्पादक तथा विक्रेताका लागि विशेष मापदण्ड लागू गरेको हो ।
विभागले कात्तिक ११ गतेदेखि अनिवार्य रूपमा लागू हुने गरी मिठाई उत्पादन तथा बिक्री प्रतिष्ठानका लागि मापदण्ड तोकेको छ । मापदण्डअनुसार मिठाई राखिएका सोकेसमा प्रत्येक परिकारको नाम, प्रयोग गरिएका कच्चा पदार्थको सम्मिश्रण, पकाउन प्रयोग गरिएको घिउ वा तेलको प्रकार, उपभोग गर्नुपर्ने अन्तिम मिति र प्रतिकिलो मूल्य स्पष्ट देखिने गरी लेबल राख्नुपर्ने व्यवस्था छ ।
विभागका महानिर्देशक सञ्जिवकुमार कर्णका अनुसार हालसम्म देशभरका १७९ मिठाई उत्पादक तथा बिक्री प्रतिष्ठानले सरकारी मापदण्ड कार्यान्वयनमा ल्याएका छन् । रुपन्देहीको बुटवलस्थित कस्तुरी मिष्ठान भण्डार पनि उक्त सूचीमा परेको छ ।
तिहारलगायत चाडपर्वका अवसरमा मिठाई खरिद गर्दा मापदण्ड पूरा गरेका तथा विश्वसनीय पसल छनोट गर्न महानिर्देशक कर्णले उपभोक्तालाई आग्रह गरेका छन् । मिठाई खरिद गर्नुअघि लेबल, उत्पादन मिति, उपभोग गर्नुपर्ने अन्तिम मिति र मूल्य स्पष्ट रूपमा हेर्नुपर्ने विभागको सुझाव छ ।
तिहारमा मिठाईको मागसँगै खाद्य स्वच्छताको चुनौती
नेपालमा दसैँ, तिहार, छठ, हरितालिका तीज, मातातीर्थ औँसी तथा नयाँ वर्षका अवसरमा मिठाईको कारोबार बढ्ने गर्छ । तिहारमा विशेषगरी दूधको खुवा तथा पिठोजन्य परिकारबाट तयार पारिएका मिठाईको माग बढी हुने गरेको छ ।
बजारमा जेरी, जिल्फी, बर्फी, पेडा, लड्डु, रसगुल्ला, लालमोहन, गुलाब जामुन, रसमलाई, कलाकन्द, बालुशाही, सोनपापडी र विभिन्न प्रकारका परम्परागत मिठाई बिक्री हुने गर्छन् । पछिल्लो समय उपभोक्ताको रुचि र स्वास्थ्य अवस्थालाई ध्यानमा राखेर चिनीरहित मिठाईको माग पनि बढ्दै गएको छ ।
बढ्दो मागको फाइदा उठाउँदै केही व्यवसायीले नक्कली दूध, नक्कली खुवा, गुणस्तरहीन तेल, अखाद्य रासायनिक रङ तथा दूषित कच्चा पदार्थ प्रयोग गरेर मिठाई उत्पादन गर्ने जोखिम रहेको विभागले जनाएको छ ।
खाद्य स्वच्छता र गुणस्तर कायम गर्दै उपभोक्तालाई सुरक्षित खाद्य सामग्री उपलब्ध गराउनु मिठाई व्यवसायीको महत्वपूर्ण जिम्मेवारी हो । विभागले मापदण्ड पूरा नगरेका व्यवसायीलाई पनि तोकिएको व्यवस्था कार्यान्वयन गर्न आग्रह गरेको छ ।
बुटवलको कस्तुरी मिष्ठान भण्डार मापदण्ड पूरा गर्ने प्रतिष्ठानको सूचीमा पर्नुले स्थानीय खाद्य व्यवसायमा स्वच्छता र गुणस्तरको महत्वलाई थप उजागर गरेको छ । चाडपर्वका बेला मिठाई खरिद गर्दा उपभोक्ताले पनि खाद्य स्वच्छता र गुणस्तरलाई प्राथमिकता दिनुपर्ने देखिन्छ ।
प्रतिक्रिया