काठमाडौँ, ३ मंसिर । नेपाली बजारमा सुनको मूल्यमा निरन्तर गिरावट आएको छ। बिहीबार पनि सुनको मूल्य तोलामा ३ हजार ३०० रुपैयाँले घटेको छ।
नेपाल सुनचाँदी व्यवसायी महासंघका अनुसार बिहीबार छापावाल सुनको मूल्य प्रतितोला २ लाख ५७ हजार ६०० रुपैयाँ कायम भएको छ। बुधबार सुन प्रतितोला २ लाख ६० हजार ९०० रुपैयाँमा कारोबार भएको थियो।
गत कात्तिक २३ गते प्रतितोला २ लाख ८४ हजार ३०० रुपैयाँ पुगेको सुनको मूल्य त्यसयता २६ हजार ७०० रुपैयाँले घटिसकेको छ। पछिल्लो पाँच दिनमा मात्रै सुनको मूल्यमा साढे २३ हजार रुपैयाँभन्दा बढीको गिरावट आएको हो।
महासंघका अनुसार कात्तिक १७ गते सुनको मूल्य तोलामा १२ हजार ६०० रुपैयाँ घटेको थियो। त्यसपछि कात्तिक २९ गते १ हजार ५०० रुपैयाँ, ३० गते १ हजार १०० रुपैयाँ, मंसिर १ गते १ हजार ९०० रुपैयाँ र २ गते ६ हजार ३०० रुपैयाँले घटेको थियो।
सुनसँगै चाँदीको मूल्यमा पनि गिरावट आएको छ। बिहीबार चाँदीको मूल्य प्रतितोला ४५ रुपैयाँले घटेर ३ हजार ३३५ रुपैयाँ कायम भएको छ। बुधबार चाँदी प्रतितोला ३ हजार ३८० रुपैयाँमा कारोबार भएको थियो।
पछिल्ला दिनमा अन्तर्राष्ट्रिय बजारमा सुनचाँदीको मूल्य घट्दै गएपछि त्यसको प्रभाव नेपाली बजारमा पनि परेको व्यवसायीहरूको भनाइ छ।
नेपाली बजारमा गत माघ १५ गते सुनको मूल्य प्रतितोला ३ लाख ३९ हजार ३०० रुपैयाँ पुगेको थियो। यो हालसम्मकै उच्च मूल्य हो। त्यसैगरी, सोही वर्ष माघ १८ गते चाँदीको मूल्य प्रतितोला ७ हजार ५०५ रुपैयाँ पुगेको थियो। चाँदीको उक्त मूल्य पनि हालसम्मकै उच्च हो।
















प्रतिक्रिया