काठमाडौं । नेपालस्थित पाकिस्तानी दूतावासको सहयोगमा काठमाडौंको कागेश्वरी मनोहरा नगरपालिका स्थित एक स्कुललाई कम्प्युटर ल्याबको स्तरोन्नती गरिएको छ ।
कागेश्वरी मनोहरा नगरपालिका वडा नं ८ स्थित श्रमशील विद्यापिठ स्कुलमा कम्प्युटर प्रयोगशालाको स्तरोन्नती गरिएको हो ।
पाकिस्तानी राजदूत सैयद हैदर शाह र वडा नं. ८ का वडाअध्यक्ष हरिभक्त पुडासैनीले एक कार्यक्रमका बीच सो ल्यावको संयुक्त रुपमा उद्घाटन गरेका छन् । पाकिस्तानको स्वतन्त्रताको ७५ औं वर्षको पूर्वसन्ध्यामा पाकिस्तानी राजदूतावासको सहयोगमा प्रयोगशालाको मर्मत र स्तरोन्नति गरिएको हो।
उद्घाटन समारोहलाई सम्बोधन गर्दै वडाअध्यक्ष पुडासैनीले नेपालको शिक्षा क्षेत्रमा पाकिस्तान सरकारको प्रयासको प्रशंसा गरे ।
विद्यालयका अध्यक्ष कमलप्रसाद दाहालले पाकिस्तानी राजदूतावासको सहयोगको प्रशंसा गर्दै नयाँ र स्तरोन्नति गरिएको कम्प्युटर प्रयोगशालाले विद्यार्थीहरूको लागि बहुमूल्य सिकाइ उपकरण सावित हुने विश्वास व्यक्त गरे। उनले कम्प्युटर ल्याब स्तरोन्नतिमा पाकिस्तानको सहयोगले नेपाली विद्यार्थीहरूप्रति पाकिस्तानको मित्रता र न्यानोपन झल्काएको बताए ।
राजदूत सैयद हैदर शाहले शिक्षा, स्वास्थ्य, संस्कृतिलगायतका विभिन्न क्षेत्रमा नेपालको सामाजिक–आर्थिक विकासका लागि पाकिस्तानी दूतावासले सहयोग गर्दै आएको बताए । उनले डिजिटल विभेदलाई कम गर्न कम्प्युटर साक्षरता अपरिहार्य हुने बताए । राजदूत शाहले नेपाली विद्यार्थीलाई सुलभ शुल्कमा उच्च गुणस्तरको शैक्षिक सुविधा उपलब्ध गराउन नेपालसँग मिलेर काम गर्ने पाकिस्तानको प्रतिबद्धता दोहोर्याए।
प्रतिक्रिया