प्रचण्ड र जनार्दनबीच सवाल जवाफ, प्रचण्डले भने – ‘तपाईंलाई हुर्काउन मेरो ठूलो भूमिका छ’

काठमाडौं । नेकपा माओवादीका अध्यक्ष पुष्पकमल दाहाल प्रचण्ड र उपमहासचिव जनार्दन शर्माबीच एकै मञ्चमा सवाल जवाफ भएको छ ।

काठमाडौंको राष्ट्रियसभा गृहमा अखिल क्रान्तिकारीले आयोजना गरेको क्रान्तिकारी फोर्स घोषणा कार्यक्रममा शर्माले उपमहासचिवको हैसियतमा नभै संगठन विभाग प्रमुखको हैसियतमा उपस्थित भएको र पार्टी नीति र नेतृत्वको विषयमा टिप्पणी गरेपछि प्रचण्डले जवाफ फर्काएका हुन् ।

जनार्दनले भनेका थिए, ‘म नीति र नेतृत्वलाई सदैव रक्षा गर्ने मान्छे हुँ, सही नीति र नेतृत्वको अहिले पनि रक्षा गर्ने मेरो दायित्व हो । त्यो कुरामा म गम्भीर छु तर नीति र नेतृत्व सही ढंगले अघि बढ्नुपर्छ भन्ने मेरो माग हो ।’

प्रचण्डले नेताहरुलाई हुर्काउन आफ्नो पनि ठूलो भूमिका रहेको बताउँदै क्रान्तिकारी विचारलाई पक्डेर उत्तराधिकारीको रुपमा आउनसक्ने बन्न सुझाव दिए । उनले भने, ‘जनार्दनजीले जाँदाजाँदै भन्नुभयो, नीति र नेतृत्वको रक्षाको कुरा । म तपाईहरुलाई भन्न चाहान्छु –जनार्दनलाई रक्षा गर्न र हुर्काउन प्रचण्डको मुख्य भूमिका हो भन्ने कुरा सबैले बुझ्न जरुरी छ ।’

प्रचण्डले अबको आफ्नो सपना पार्टीमा राम्रो उत्तराधिकारी तयार बनुन भन्ने रहेको समेत जिकिर गरे । ‘म त जनयुद्धको तयारीको पनि नेतृत्व गरेँ, संविधान र गणतन्त्रको पनि नेतृत्व गरेँ । अब मेरो सपना के हो त भने राम्रो उत्तराधिकारी तयार हुन् । तिनले पार्टीलाई एकतावद्ध गरेर लैजाऊन् । तिनले तमाम क्रान्तिकारीलाई सहि स्कुलिङ गरुन् र हाम्रो क्रान्तिकारी विरासत र परम्परालाई अगाडि बढाउन ।’ प्रचण्डले भने ‘हजारौ र लाखौं उत्तराधिकारी तयार हुन् यही मेरो सपना छ ।’

प्रचण्डले नेता कार्यकर्तालाई उदारताका साथ ठुलो छाती लिएर अघि बढन आग्रह समेत गरे ।