हराएको टुकुचा खोला जयनेपालमा भेटियो

काठमाडौं । काठमाडौंको जयनेपाल सिनेमा घरको कम्पाउण्डमा टुकुचा खोला फेला परेको छ ।

महानगरापालिकाको टोलीले जयनेपाल हलको कम्पाउण्ड उत्खनन गर्दा टुकुचा खोला भेटिएको हो । महानगरले त्यस क्षेत्रमा १५ फिट खनेको थियो । खोलाको बहाब क्षेत्र पत्ता लगाएर डोजरले खोतल्दा खोला फेला पारिएको हो।

नारायणहिटी दरबार क्षेत्रसम्म खुलारहेको टुकुचा सडकपार भएपछि हराएको थियो । टुकुचा काठमाडौं प्लाजासम्मै हराएपछि काठमाडौं महानगरपालिकाले खोजी सुरु गरेको थियो । यस क्षेत्रमा खोला छोपेर त्यहाँमाथि स्थायी संरचना समेत बनाएको पाइएको छ । स्थानीयबासिन्दाले धेरै वर्ष पहिलेदेखि टुकुचाको खोजी गर्नुपर्ने माग गर्दै आएका थिए । तर राजनीतिक पहुँचका र महानगरको वेवास्ताका कारण सिंगो खोला नै हराएको थियो ।

केही दिनअघि महानगरापालिकाले टुकुचा खोला आसपासको क्षेत्रमा अतिक्रमित संरचना हटाउन साउन १२ गते सूचना जारी गरेको थियो ।