पोखरा । कोरोना भाइरसको संक्रमण गण्डकी प्रदेशमा तिब्र गतिमा बढिरहेको छ । आइतबार बिहान गण्डकी प्रदेशको सामाजिक मन्त्रालयअन्तर्गतको स्वास्थ्य निर्देशनालयले जारी गरेको पछिल्लो तथ्याङ्क अनुसार ३८ जना संक्रमित थपिएका छन् ।
जसमध्ये, स्याङजामा १४, बागलुङमा १० जना थपिएका छन् । गोरखा जिल्लामा पहिलो पटक १० जना संक्रमित देखिएका छन् । यस्तै, नवलपरासी पूर्वमा ४ जना नयाँ संक्रमित देखिएको प्रदेश स्वास्थ्य निर्देशनालयले जनाएको छ ।
स्याङजाको वालिङ नगरपालिकाका २१ देखि ४९ वर्षसम्मका १३ जना पुरुष र भीरकोट नगरपालिकाका ४५ वर्षीय एक पुरुषमा कोरोना संक्रमण देखिएको छ ।
विगत केही दिनदेखि कोरोना संक्रमित बढ्दै गएको बागलुङको बडिगाड गाउँपालिकामा २२ देखि ५२ वर्षका ९ जना पुरुषलाई संक्रमण पुष्टि भएको छ । यिमध्ये एकजनाको उमेर खुल्न नसकेको विज्ञप्तिमा जनाइएको छ । यस्तै, ढोरपाटन नगरपालिका एक जना संक्रमित थपिएका छन् ।
उता, गोरखाको गण्डकी नगरपालिकाका २० देखि ४३ वर्षउमेरका ९ जनामा कोरोना संक्रमण पुष्टि भएको छ भने पालुङटार नगरपालिकाका १७ वर्षीय एक युवामा पनि कोरोना भाइरसको संक्रमण देखिएको छ ।
नवलपरासी पूर्वको हुप्सेकोट गाउँपालिकाका २० देखि ४५ वर्ष उमेरका चार जजना पुरुषमा पनि कोरोना भाइरस पोजेटिभ देखिएको छ ।
योसँगै गण्डकी प्रदेशमा कोरोना पोजेटिभको संख्या १ सय १३ पुगेको छ ।
प्रतिक्रिया