बेइजिङ । चिनियाँ कम्युनिष्ट पार्टी (सीपीसी) को महासचिवमा सी चिनफिङ निर्वाचित भएका छन् ।
शनिबार सम्पन्न २० औं पार्टीमहाधिवेशनपछि आइतबार बसेको केन्द्रीय कमिटीको पहिलो पूर्ण बैठकले सी चिनफिङलाई २० औं केन्द्रीय समितिको महासचिवमा निर्वाचित गरेको हो ।
सन् २०१२ मा पहिलोपटक महासचिवमा निर्वाचित भएका सी २०१७ मा पुनः दोस्रो पटक महासचिवमा निर्वाचित भएका थिए । सीपीसीको विधानलाई परिवर्तन गरिएपछि सी पुनः तेस्रोपटक पनि महासचिवमा निर्वाचित भएका छन् ।
सी कै अध्यक्षतामा सम्पन्न बैठकमा सीपीसीको २०औँ केन्द्रीय समितिका २०३ सदस्य र १६८ वैकल्पिक सदस्यहरू सहभागी थिए।
बैठकले सीलाई सीपीसी केन्द्रीय सैन्य आयोगको अध्यक्षमा पनि नियुक्त गरेको छ ।
बैठकले सीपीसी केन्द्रीय समितिको राजनीतिक ब्यूरोको सात सदस्यीय स्थायी समिति पनि चयन गरेको छ । जसमा सी चिनफिङ, ली चियाङ, चाओ लेची, वाङ हुनिङ, काइ ची, तिङ सुइसियाङ र ली सी छन्।
बैठकले चिनियाँ कम्युनिष्ट पार्टी केन्द्रीय समितिको राजनीतिक ब्यूरोका सदस्यहरू पनि निर्वाचित गरेको छ । जसले सीपीसी केन्द्रीय समितिको राजनीतिक ब्यूरोको स्थायी समितिले मनोनित सीपीसी केन्द्रीय समिति सचिवालयका सदस्यहरूलाई अनुमोदन गरेको थियो।
बैठकले केन्द्रीय सैन्य आयोगका सदस्यहरुको नाम तोकेको छ ।
बैठकले २० औं सीसीडीआईको पहिलो पूर्ण बैठकमा निर्वाचित केन्द्रीय अनुशासन आयोग (सीसीडीआई) को स्थायी समितिका सचिव, उपसचिव र सदस्यहरूलाई अनुमोदन गरेको छ।
प्रतिक्रिया