बुटवल । भारतबाट घर फर्किर्ने नेपाली नागिरकको संख्या निरन्तर बढिरहेको छ । सरकारले खुला गरेका २० नाकाबाट दैनिक सयौं नागरिक स्वदेश फर्किरहेका छन् ।
कोरोना भाइरसको महामारीबाट नराम्रोसँग थलिएको भारतमा रहेका नागरिकहरु भित्रिएसँगै नेपालमा पनि कोरोना संक्रमण दिनदिनै बढिरहेको छ ।
रुपन्देहीको बेलहिया नाकाबाट मात्रै जेठ महिनामा १८ हजार बढी नेपाली स्वदेश फर्किएका छन् । इलाका प्रहरी कार्यालय बेलहियासँग जेठ ३२ गतेसम्मको तथ्याङ्क अनुसार बेलहिया नाकाहुँदै १८ हजार ४९१ जना नेपाली नेपाल भित्रिएका छन् । आइतबार मात्रै ६७६ जना नेपाली नेपाल भित्रिएका छन् ।
बेलहिया नाकाबाट भित्रिएका अधिकांश नागरिक बागलुङ, कास्की, स्याङ्जा, पाल्पा, गुल्मी, अर्घाखाँची, रुपन्देही, नवलपरासी, कपिलवस्तुका रहेका छन् ।
नेपाल आएका सबैलाई उनीहरुको सम्बन्धित जिल्लाको पालिकासँग समन्वय गरेर गन्तव्यमा पठाइने गरिएको छ । जिल्ला पुग्ने वित्तिै उनीहरु तोकिएको क्वारेन्टिनमा बस्नुपर्ने नियम बनाइएको छ ।
त्यसो त, नेपाली नागरिक मात्रै घर फर्किएका छैनन् । नेपालमा रहेका भारतीय नागरिक पनि आफ्नो देश फर्किका छन् ।
बेलहियाबाट जेठमा २३ हजार ६४२ जना भारतीय नागरिक भारत गएका छन् । आइतबार मात्रै ६११ जना भारतीय नागरिक भारत प्रवेश गरेको इलाका प्रहरी कार्यालय, बेलहियाले जानकारी दिएको छ ।
कोरोना भाइरसको महामारीका कारण भारतमा कामविहीन बनेपछि नेपाली नागरिक घर फर्कने क्रम सुरु भएको थियो । भारतका विभिन्न ठाउँमा रोजगारीका लागि गएका नेपाली नागरिक अहिले भारतीय रेल तथा सार्वजनिक बस चढेर सुनौली नाकासम्म आउने छन् ।
प्रतिक्रिया