नेपालगन्ज । नेपालगन्जमा फैलिएको दादुराको माहामारिबाट एक बालकको ज्यान गएको छ । नेपालगन्ज–५ का २ वर्ष ५ महिनाको एक बालकको दादुरा माहामारिका कारण मृत्यु भएको हो । बालकलाई उपचारको लागि अस्पताल लैजादै गर्दा बाटोमा नै मृत्यु भएको नेपालगन्ज उपमहानगरको स्वास्थ्यशाखाले पुष्टि गरेको छ ।
मृतक बिरामी बालकमा दादुराको चिन्ह लक्षण देखिएको नेपालगञ्ज उपमहानगपालिका स्वास्थ्य शाखा प्रमुख रामबहादुर चन्दले बताए । उनले बिरामी बालकलाई ज्वोरो आउने लगायत दादुराको लक्षण देखिएको अवस्थामा उपचारको लागि अस्पताल लैजादै गर्दा बाटोमा नै मृत्यु भएको बताए । ‘हामीले मृत्यु भएको बालकले खोप लगाए नलगाएको समेत खोजिनीति गर्दै छौ ।’ उनले भने ।
सन २०२३ मा दादुरा उन्मुलनको घोषणा गर्ने तयारी रहेकै बेलामा नेपालगञ्जमा एकाएक दादुरा संक्रमण देखिएको हो । नेपालगञ्ज उपमहानगरका विभिन्न वडाहरुमा दादुराको संक्रमण देखिएको छ ।
नेपालगञ्जका आधा दर्जन वडामा दादुराको बिरामी देखा परेका छन् । ५, ७, ८, १०, १५, २२ नम्बरमा दादुराका बिरामी देखा परेका छन् । यी वडाहरुमा कम्तीमा २५ जनालाई दादुरा पुष्टि भइसकेको छ ।
उपमहानगरपालिकाका स्वास्थ्य शाखाका प्रमुख चन्दले विशेषज्ञहरुको टीम टोलटोलमा पुगेर जनचेतना फैलाउने, बिरामीलाई अस्पताल लैजाने आग्रह गर्ने, दादुरा तुरुन्तै सर्ने भएकाले छुट्टै ठाउँमा राख्न आग्रह गर्ने, अभिलेख लिने र छिट्टै खोपको अभियान चलाउने तयारी गरेको बताए ।
नेपालगञ्जमा दादुराबाट दुईदर्जन बढी संक्रमित भएको र यो भन्दा बढी पनि हुनसक्ने आँकलन गरिएको छ । शुरुमा एकाघरमा ४ जनामा दादुरा देखिएपछि दादुरा संक्रमितको खोजी गरिएको थियो ।
प्रतिक्रिया