काठमाडौं । राष्ट्रिय स्वतन्त्र पार्टीकी सांसद सोबिता गौतमले उपसभामुखमा दुई सीमान्त समुदायका महिला प्रतिस्पर्धामा रहनु सुखद पक्ष भएको बताएकी छिन् ।
प्रतिनिधिसभा बैठकमा उपसभामुखमा इन्दिरा राना मगरलाई निर्वाचित गरियोस् भन्ने प्रस्ताव प्रस्तुत गर्दै सांसद गौतमले यस्तो बताएकी हुन् । गौतमले लोकतन्त्र भनेको शासन पद्धति मात्र नभएको जिकिर गर्दै सीमान्त समुदायका महिला प्रतिस्पर्धामा आउनु नै लोकतन्त्रको सुन्दर र सुखद पक्ष भएको बताइन ।
समाजको सबैभन्दा पिछडिएको वर्गले मूलधारको प्रतिस्पर्धामा भाग लिन पाउँदा मात्र लोकतन्त्रको अब्बल परीक्षा सम्भव हुने उनको जिकिर थियो ।
गौतमले मगर उपसभामुखमा निर्वाचित हुँदा उक्त पदको गरिमा बढ्ने दाबी गरिन । उनले समाज रूपान्तरणमा निखारिएर राजनीतिमा आएकाकी मगरलाई उपसभामुखमा निर्वाचित गर्न सबै सदनलाई आग्रह समेत गरिन् ।
उपसभामुख पदमा सत्ता गठबन्धनबाट राष्ट्रिय स्वतन्त्र पार्टीकी मगर र विपक्षी गठबन्धनबाट कांग्रेस सांसद मुक्ताकुमारी यादव प्रतिस्पर्धामा रहेका छन् ।
प्रतिक्रिया