कोरोना भाइरसका कारण बाराका एक पुरुषको त्रिवि शिक्षण अस्पतालमा मृत्यु

कोरोना भाइरसको संक्रमणबाट आज फेरि अर्का एक व्यक्तिको निधन भएको छ ।

बाराको फेटा गाउँपालिका वडा नं. ३ निवासी ७७ वर्षीय वृद्धको त्रिभुवन विश्वविद्यालय शिक्षण अस्पताल महाराजगन्जमा उपचारका क्रममा सोमबार दिउँसो निधन भएको हो ।

उनी निमोनिया, मस्तिष्कघात र मृगौलाका रोगी रहेको स्वास्थ्य तथा जनसंख्या मन्त्रालयका प्रवक्ता प्राडा. जागेश्वर गौतमले बताए ।

यसअघि, आइतबार बिहान वीरगन्ज महानगरपालिका वडा नं. १० बस्ने भारतीय नागरिकको मृत्यु भएको थियो ।

यस्तै धनुषा सहिदनगर ८ का ३६ वर्षिय पुरुषको पनि ११ गते नै कोरोनाका कारण मृत्यु भएको छ । साउन १० गते ज्वरु र खोकीसँगै स्वासप्रस्वासमा समस्या देखिएपछि प्रादेशिक अस्पताल जनकपुरको इमरजेन्सीमा भर्ना भएका थिए ।

आइसियुमा राखेर उपचार गरिएपछि स्वास्थ्यमा सुधार नआएपछि उनलाई विपि कोइराला स्वास्थ्य विज्ञान प्रतिष्ठान रिफर गरिएको थियो । उपचारका लागि लैजादै गर्दा उनको मृत्यु भएको थियो ।

यससँगै हालसम्म नेपालमा कोरोनाबाट मृत्यु हुनेको संख्या ४८ पुगेको छ।