काठमाडौं । कोरोना भाइरसको संक्रमणबाट शनिबारसम्म १४६ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
मन्त्रालयले आयोजना गर्ने नियमित कोरोना अपडेट कार्यक्रममा दिएको जानकारी अनुसार १४६ जनाको मृत्यु भएको छ ।
मन्त्रालयले गरेको अपडेट अनुसार पछिल्लो २४ घण्टामा एक ६ वर्षीय बालकसहित ९ जनाको निधन भएको छ । ६ वर्षीय बालक सुनसरीका भएको मन्त्रालयका प्रवक्ता प्राडा जागेश्वर गौतमले जानकारी दिए ।
सुनसरीमै अर्का एक जना ६७ वर्षीय पुरुषको पनि मृत्यु भएको छ ।
यसैगरी पर्सामा ३ जना पुरुषको मृत्यु भएको छ । ६१, ५८ र ४८ वर्षका पुरुषको मृत्यु भएको प्रवक्ता डा. गौतमले बताए ।
यस्तै, बारामा ५८ वर्षीय एक जना पुरुष, सिराहामा ६८ वर्षीय पुरुष, मकवानपुरमा ५६ वर्षीय पुरुष र भक्तपुरमा ७३ वर्षीय पुरुषको पनि मृत्यु भएको छ ।
स्वास्थ्य मन्त्रालयको आधिकारिक तथ्यांक बाहेक शनिबार अपरान्हसम्म थप मृत्यु भएको समाचारहरु सार्वजनिक भैरहेका छन् । तर, मन्त्रालयले त्यसलाई अपडेट गरेको भने छैन ।
प्रतिक्रिया