कोरोना संक्रमित महिलाको वीरगन्जमा मृत्यु

वीरगन्ज । वीरगन्जमा अर्का एक जना कोरोना संक्रमितको मृत्यु भएको छ ।

वीरगन्ज महानगरपालिका–११ श्रीपुर निवासी ५६ वर्षीय कोरोना संक्रमित महिलाको वीरगन्ज हेल्थ केयर अस्थायी कोरोना अस्पतालमा महिलाको मृत्यु भएको हो ।

गत साउन २४ गतेदेखि उपचाररत ती महिलाको शनिबार साँझ साढे ७ बजे मृत्यु भएको जिल्ला प्रशासन कार्यालय पर्साले जनाएको छ ।

थाइरोइड भएकी ती महिलालाई ज्वरो, खोकी, श्वासप्रश्वासमा समस्या आएपछि अस्पताल भर्ना गरिएको थियो ।

उनको साउन २२ गते स्वाब संकलन गरिएकोमा साउन २४ गते कोरोना संक्रमण पुष्टि भएको थियो । त्यसपछि उनलाई अस्पतालको आईसीयूमा भर्ना गरेर उपचार सुरु गरिएको थियो ।

तर निरन्तर स्वास्थ्य अवस्था कमजोर बन्दै गएपछि भेन्टिलेटरमा उपचार गर्दागर्दा उनको मृत्यु भएको प्रशासन कार्यालयले जनाएको छ ।

पर्सा जिल्लाका मात्रै २९ जना कोरोना संक्रमितको मृत्यु भैसकेको छ ।