भक्तपुरकी कोरोना संक्रमित महिलाको धुलिखेल अस्पतालमा मृत्यु

काठमाडौं । भक्तपुरको सूर्यविनायककी कोरोना संक्रमित एक महिलाको धुलिखेल अस्पतालमा मृत्यु भएको छ ।

सूर्यविनायक नगरपालिका वडा नं. ८ दोकाचाकाकी ५३ वर्षीय महिलाको उपचारको क्रममा मंगलबार राति धुलिखेल अस्पतालमा मृत्यु भएको हो ।

ती महिलालाई गतसाता मात्र कोरोना संक्रमण पुष्टि भएको थियो । विगतदेखि नै थाइराइडको समस्या रहेकी ती महिलामा पछिल्लो समय स्वास्थ्यमा गम्भीर समस्या उत्पन्न भएपछि भेन्टिलेटरमा राखेर उपचार गरिँदै आएको थियो ।

थाइराइडकै उपचारकका लागि अस्पताल पुगेकी ती महिलालाई त्यहीँ कोरोना भाइरस सरेको हुनसक्ने सूर्यविनायक नगरपालिकाको सामाजिक विकास समिति संयोजक एवं वडाध्यक्ष किरण थापाले बताएका छन् ।

मंगलबार दिउँसो मात्रै उनको परिवारका सात जना सदस्यको पीसीआर परीक्षणका लागि स्वाब संकलन गरिएको थियो ।