चितवनमा र भक्तपुरमा दुई जना कोरोना संक्रमित महिलाको मृत्यु

चितवन । भरतपुरस्थित चितवन मेडिकल कलेजमा उपचाररत हेटौंडाकी एक जना कोरोना संक्रमितको मृत्यु भएको छ ।

हेटौंडा उपमहानगरपालिका वडा नं. १९ कि ७१ वर्षीया महिलाको शुक्रबार बिहान ६ बजेर ५० मिनेटमा मृत्यु भएको कलेजका निर्देशक डा. दयाराम लम्सालले विज्ञप्तिमार्फत जानकारी गराएका छन् ।

श्वासप्रश्वासमा गम्भीर समस्या आएपछि गत ७ गते उनलाई चितवन मेडिकल कलेजको इमरजेन्सी विभागमा उपचारका लागि ल्याइएको थियो ।

परीक्षण गराउँदा कोरोना पोजेटिभ देखिएपछि उनलाई त्यही आईसीयूमा राखेर उपचार गरिँदै आएको अस्पतालले जनाएको छ । उनी दम र निमोनियाको समेत बिरामी थिइन् ।

यस भक्तपुरको मध्यपुर थिमि नगरपालिका–३ गठ्ठाघरकी ६४ वर्षीया महिलाको मृत्युपछि कोरोना संक्रमण पुष्टि भएको छ ।

बिहीबार दिउँसो नागरिक कम्युनिटी अस्पताल गठ्ठाघर ल्याउँदा ल्याउँदै उनको मृत्यु भएको थियो । मृत्युपछि पीसीआर परीक्षण गराउँदा कोरोना संक्रमण पुष्टि भएको अस्पतालले जनाएको छ ।