चितवनमा फेरि कोरोना संक्रमित महिलाको मृत्यु

चितवन । चितवन मेडिकल कलेजमा अर्का एक जना कोरोना संक्रमित महिलाको मृत्यु भएको छ ।

हेटौंडा उपमहानगरपालिका वडा नं. ५ की ४९ वर्षीया महिलाको शनिबार बिहान मृत्यु भएको अस्पतालले जनाएको छ । मृगौला रोगबाट पीडित ती महिलाको आईसीयूमा राखेर उपचार गरिएकै अवस्थामा मृत्यु भएको हो ।

डायलाइसिस गर्नका लागि साउन २७ गते चितवन मेडिकल कलेज आएकी उनको तीन पटक सम्म डायलाइसिस गरिएको थियो । सोही क्रममा कोरोना परीक्षण गर्दा उनमा संक्रमण पुष्टि भएको थियो ।

यसअघि शुक्रबार बिहान पनि हेटौंडाकै ७१ वर्षीया कोरोना संक्रमित महिलाको मृत्यु भएको थियो । यस्तै, शुक्रबार नै चितवन र गोरखाका अन्य दुई जनाको पनि मृत्यु भएको थियो ।