काठमाडौं । भारतको केरलाबाट दिल्लीतर्फ जाँदै गरेको एयर इन्डियाको विमान रडारमा खराबी देखिएपछि आइतबार राति चेन्नई विमानस्थलमा आपतकालीन अवतरण गरिएको छ ।
उक्त विमानमा केरलाका कांग्रेस महासचिव के.सी. वेणुगोपाल, यूडीएफ संयोजक अधूर प्रकाश, कांग्रेस नेता कोडिकुन्निल सुरेश र के. राधाकृष्णनसहित चार सांसद तथा तमिलनाडुका सांसद रोबर्ट ब्रुस सवार थिए ।
अवतरणपछि पत्रकारसँग वेणुगोपालले यस घटनालाई ठूलो दुर्घटनाबाट बचेको अनुभवको रूपमा वर्णन गर्दै भने, “विमानमा रडारको समस्या थियो, जसका कारण चालक दल आपतकालीन अवतरण गर्न बाध्य भयो । हामी अवतरण गर्नुअघि करिब एक घण्टा दस मिनेट हावामा थियौं । मैले यस विषयमा नागरिक उड्डयन महानिर्देशकलाई जानकारी गराइसकेको छु ।”
सबै यात्रु सुरक्षित रहेका भए पनि घटनाले हवाई ट्राफिक समन्वय र रनवे सुरक्षाबारे प्रश्न उठाएको बताइएको छ । स्रोतका अनुसार, पहिलो अवतरण प्रयासको क्रममा रनवेमा अर्को विमान रहेकोले स्थितिको गम्भीरता बढेको थियो ।
विमानस्थल अधिकारीहरूले भने घटनाबारे अहिलेसम्म औपचारिक प्रतिक्रिया दिएका छैनन् ।
प्रतिक्रिया