देशभरका विभिन्न सडक खण्डमा पहिरोले सवारी आवागमन पूर्ण अवरुद्ध

काठमाडौं । देशका विभिन्न सडक खण्डमा पहिरो खस्दा सवारी आवागमन पूर्ण रूपमा अवरुद्ध भएको छ ।

ट्राफिक प्रहरीले मंगलबार सार्वजनिक गरेको सूचनाअनुसार हाल चार वटा प्रमुख स्थानमा यातायात सञ्चालन रोकिएको छ ।

चितवनको इच्छाकामना गाउँपालिका–५ स्थित तुइनखोलामा नारायणगढ–मुग्लिन सडक खण्ड माथिबाट पहिरो खसेपछि आवागमन रोकिएको छ ।

यस्तै, सिन्धुपाल्चोकको भोटेकोशी गाउँपालिका–२ कोदारीमा पनि अरनिको राजमार्ग पहिरोका कारण बन्द भएको छ ।

त्यसैगरी, रसुवाको गोसाईकुण्ड गाउँपालिका–२ मा २०८२ साल असार २४ गतेको बाढीले पुल बगाएपछि नेपाल–चीन नाका अझै अवरुद्ध भएको ट्राफिक प्रहरीले जनाएको छ ।

कोशी राजमार्ग अन्तर्गत संखुवासभाको भोटखोला गाउँपालिका–४ बरुण र मकालु गाउँपालिका–३ एकुवामा पनि पहिरो खसेका कारण सडक सम्पूर्ण रूपमा बन्द भएको सूचना जारी गरिएको छ ।

ट्राफिक प्रहरीले सम्भावित जोखिमलाई ध्यानमा राखी वैकल्पिक मार्ग प्रयोग गर्न आग्रह गरेको छ ।