गाँजा सेवन गरेर आन्दोलन गर्न पुगेका डा. निकोलसलाई सुधार केन्द्र पठाईँदै

काठमाडौं । जेन जीको नामबाट भएको भनिएको प्रदर्शनमा गाँजा सेवन गरेर पुगेका डा. निकोलस भुसाललाई प्रहरीले सुधार केन्द्र पठाउने भएको छ । गृहमन्त्री ओमप्रकाश अर्यालको राजीनामा माग्दै आन्दोलनमा उत्रिएका डा. भुसाललाई पक्राउपछि स्वास्थ्य परीक्षण गर्दा गाँजा सेवन गरेको पुष्टि भएपछि प्रहरीले उनलाई सुधार केन्द्र पठाउने भएको हो ।

आफूलाई अभियन्ता बताउने भुसाललाई प्रहरीले आज माइतीघरबाट पक्राउ गरेको थियो । पक्राउका क्रममा भुसालले आफुहरुले नै बनाएको गृहमन्त्रीले आफुलाई पक्राउ गरेको भन्दै चर्को भाषण दिएका थिए ।

पक्राउपछि स्वास्थ्य परीक्षण गर्दा भुसालले गाँजा सेवन गरेको पुष्टि भएको प्रहरीले दाबी गरेको छ । यसअघि पनि रुपन्देहीमा भएका विभिन्न आन्दोलन तथा डा. भुसाल सहभागी कार्यक्रमहरुमा उनले गाँजा सेवन गर्ने गरेको आरोप लाग्दै आएको थियो ।

प्रहरीले शुरूमा वीर अस्पताल, त्यसपछि त्रिवि शिक्षण अस्पताल र अन्तिममा प्रहरी अस्पताल लगेको थियो । प्रहरी अस्पतालमा उनको स्वास्थ्य जाँच गर्दा गाँजा सेवन गरेको भेटिएको जिल्ला प्रहरी परिसर काठमाडौंका प्रवक्ता एवं प्रहरी उपरीक्षक पवन भट्टराईले जानकारी दिए । यसअघि पक्राउ पर्दा पनि भुसालले गाँजा सेवन गरेको पाइएको प्रहरीको दाबी छ ।

बिहीबार जिल्ला प्रशासन कार्यालयबाट कुनै पनि समूहले आन्दोलनका लागि अनुमति नलिएको अवस्थामा भुसालले मान्छे जम्मा गरी आन्दोलन गर्न उक्साएपछि प्रहरीले उनलाई पक्राउ परेका थिए ।