काठमाडौं । आईसीसी एकदिवसीय विश्वकप लिग-२ अन्तर्गतको खेलमा नेपाल यूएईसँग पाँच विकेटले पराजित भएको छ । नेपालले दिएको २३४ रनको लक्ष्य यूएईले ४३.३ ओभरमै पाँच विकेट गुमाएर पूरा गर्दै जित हात पारेको हो ।
कप्तान रोहित कुमार पौडेलले उत्कृष्ट शतक प्रहार गरे पनि टिमलाई जित दिलाउन सकेनन् । नेपालका बलरहरू यूएईका ब्याट्सम्यानहरूलाई रोक्न असफल देखिए । लगातार दोस्रो हारसँगै नेपालको लिग-२ अभियान थप चुनौतीपूर्ण बनेको छ ।
यूएईका लागि आर्यन शर्माले ९८ बलमा ९८ रनको शानदार इनिङ्स खेले । यस्तै, अलिशान शराफूले २६ बलमा ४५ रन, मोहम्मद वासिमले २६, राहुल चोपरा १५, ध्रुव परासर १६, सर्सित कौसिक १३, र जाहिद अलीले ११ रन जोडे ।
नेपालका बलिङ तर्फ सन्दीप लामिछानेले २ विकेट, जबकि करण केसी र दीपेन्द्र सिंह ऐरीले १-१ विकेट लिए ।
यो जितसँगै यूएई ८ अंकसहित अन्तिम स्थानमा रहे पनि नेपालको स्थिति पनि राम्रो छैन । १८ खेलमा पाँच जित र दुई बराबरीसहित नेपालका १२ अंक मात्र छन् ।
लिग तालिकामा २२ खेलमा १६ जितका साथ अमेरिका ३२ अंकसहित शीर्ष स्थानमा छ । ३० अंकसहित स्कटल्यान्ड दोस्रो, २८ अंकसहित नेदरल्यान्ड तेस्रो, २४ अंकका साथ ओमान चौथो, २१ अंकसहित क्यानडा पाँचौं र १९ अंकका साथ नामिबिया छैठौं स्थानमा रहेका छन् ।
प्रतिक्रिया