कार्यालयमा गैरहाजिर २७ प्रहरीलाई सात दिनभित्र हाजिर हुन प्रहरी प्रधान कार्यालयको निर्देशन

काठमाडौं । कार्यालयमा आफूखुसी गैरहाजिर भएका २७ प्रहरीलाई सात दिनभित्र हाजिर हुन प्रहरी प्रधान कार्यालयले निर्देशन दिएको छ । गैरहाजिरमध्ये प्रहरी सहायक निरीक्षक १ जना, प्रहरी हबल्दार २ जना, सहायक हबल्दार ३ जना, प्रहरी जवान २० जना र कार्यालय सहयोगी १ जना रहेका छन् ।

उल्लेखित सूचीमा दुई जना बाहेक सबैजना ‘जेनजी आन्दोलन’ पछि नै कार्यालयसँग कुनै सम्पर्कमा नरहेको प्रष्ट भएको प्रहरी प्रधान कार्यालयले जनाएको छ । गैरहाजिर भएको मिति, नाम, ठेगाना लगायतका विवरणसहित सार्वजनिक सूचना जारी गर्दै कार्यालयले बाटोको म्याद बाहेक सात दिनभित्र हाजिर हुन निर्देशन दिएको हो ।

गैरहाजिर हुने कारण भने खुलेको छैन । हाजिर हुँदा आफ्नो अनुपस्थितिको कारण सहित सन्तोषजनक स्पष्टीकरण पेश गर्नुपर्ने कार्यालयले जनाएको छ ।

निर्देशन अवहेलना गरे कानुनी कारबाही गरिने चेतावनी प्रहरी प्रधान कार्यालयले सार्वजनिक सूचनामार्फत दिएको छ ।