बुटवल । रुपन्देहीको देवदहमा पेस्तोलबाट गोली फायर हुँदा बुटवलका एक युवक घाइते भएका छन् । घटनामा संलग्न रहेको आरोपमा प्रहरीले पेस्तोल र गोलीसहित तीन जनालाई नियन्त्रणमा लिएको छ ।
जिल्ला प्रहरी कार्यालय भैरहवा, रुपन्देहीका सूचना अधिकारी प्रहरी नायब उपरीक्षक कृष्णकुमार चन्दका अनुसार २०८३ असोज १७ गते दिउँसो करिब ३ः४५ बजे देवदह नगरपालिका-५ मा ४२ वर्षीय दीपक खरेल भनिने दुर्गाप्रसाद खरेलले पेस्तोलबाट एक राउन्ड गोली फायर गरेका थिए ।
गोली फायर हुँदा बुटवल उपमहानगरपालिका-९ मिलनचोकका २२ वर्षीय रायन खत्री क्षेत्रीको दाहिने गालाको छाला खोसिएर घाइते भएको डीएसपी चन्दले जानकारी दिए । उनको देवदह मेडिकल कलेज, भलुहीमा उपचार भइरहेको छ ।
घटनाको जानकारी पाएलगत्तै प्रहरी चौकी खैरेनीबाट खटिएको प्रहरी टोलीले घटनामा संलग्न भनिएका खरेलसहित तीन जनालाई नियन्त्रणमा लिएको हो ।
प्रहरीले खरेलको साथबाट एक थान पेस्तोल र दुई राउन्ड गोली बरामद गरेको जनाएको छ । पक्राउ पर्नेमा देवदह नगरपालिका–५ मितेरी गाउँका ४२ वर्षीय दीपक खरेल भनिने दुर्गाप्रसाद खरेल, ३८ वर्षीय कमल शर्मा र १८ वर्षीय अमृत खरेल रहेका छन् ।
घटनाबारे थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ ।
प्रतिक्रिया