काठमाडौं। नेपाली कम्युनिष्ट पार्टीका सहसंयोजक माधवकुमार नेपालले देशमा स्वच्छ र उत्तरदायी राजनीति स्थापना गर्ने नेतृत्व अब आफ्नो पार्टीले गर्ने घोषणा गरेका छन्।
सुदूरपश्चिमको धनगढीमा शुक्रबार सम्पन्न ‘एकता सन्देश सभा’लाई सम्बोधन गर्दै उनले वर्तमान राजनीतिक वातावरणमा इमानदारी, समर्पण र राष्ट्रप्रेमको भावना कमजोर बन्दै गएको भन्दै गम्भीर चिन्ता व्यक्त गरे।
नेपालका अनुसार अहिलेका राजनीतिक दलहरूमा दलालीकरण, ठेकेदारीकरण, व्यापारीकरण, भ्रष्टीकरण र अपराधीकरणको प्रवृत्ति हावी भएको छ, जसका कारण देश कुशासन र भ्रष्टाचारको चपेटामा परेको छ।
‘दलहरूमा दलाली, ठेक्का, व्यापार, भ्रष्टाचार र अपराधीकरणको प्रवृत्ति चुलिँदै गएको छ,’ नेपालले भने, ‘अब त्यसको अन्त्य गरी स्वच्छ राजनीति निर्माण गर्ने नेतृत्व नेपाली कम्युनिष्ट पार्टीले लिनेछ।’
उनले राजनीतिक नेताहरूमा इमानदारी र देशप्रतिको समर्पण बिना विकास सम्भव नहुने उल्लेख गर्दै आफ्नो पार्टी जनताप्रति उत्तरदायी भएर अगाडि बढ्ने बताए।
‘इमानदारी, समर्पण, देश बनाउने हुटहुटी र चिन्ता नभई देश अघि बढ्दैन,’ उनले भने, ‘हामीसँग देश र जनताको वास्तविक चिन्ता छ, त्यसैले स्वच्छ राजनीतिको मार्ग पहिल्याउने जिम्मा हामीले लिनेछौँ।’
नेपालको भनाइमा, नेपाली कम्युनिष्ट पार्टीको एकता अभियान केवल संगठन विस्तार मात्र नभई देशमा सुशासन, पारदर्शिता र जिम्मेवार राजनीतिक संस्कृतिको पुनःस्थापनासँग पनि जोडिएको छ।
प्रतिक्रिया