काठमाडौं । सत्तारुढ नेपाल कम्युनिष्ट पार्टीका अध्यक्षद्वय केपी शर्मा ओली र पुष्पकमल दाहाल प्रचण्डबीच भेटवार्ता भएको छ ।
प्रधानमन्त्री निवास बालुवाटारमा भएको भेटवार्तामा अध्यक्षद्वयबीच पार्टी सचिवालय बैठकले गरेका निर्णयहरु अघि बढाउने विषयमा छलफल भएको बताइएको छ ।
सचिवालय बैठकमा मन्त्रिपरिषद् पुनर्गठनका लागि दुई अध्यक्षबीच छलफल गर्ने अनौपचारिक सहमति भएको थियो ।
यसैगरी पार्टीको सांगठनिक एकता पुरा गर्ने गरी ठोस प्रस्ताव तयार पार्न अध्यक्ष र महासचिवलाई जिम्मेवारी दिइएको थियो । नेकपा सचिवालय बैठकले संवैधानिक निकायमा लामो समयदेखि रिक्त रहेका पदपूर्ति गर्न सरकारलाई आग्रह गरेको थियो ।
यिनै विषयलाई कार्यान्वयन गर्नका लागि अध्यक्षद्वय प्रचण्ड र ओलीबीच छलफल भएको बुझिएको छ ।
मन्त्रिपरिषद पुनर्गठनका विषयमा धेरै नेताहरुको चासो जोडिएको छ । मन्त्री बन्नका लागि खुट्टा उचालेर बसेका नेताहरुले आफुनिकट अध्यक्षलाई भेटेर दबाब दिन सुरु गरिसकेका छन् ।
मन्त्रिपरिषद् पुनर्गठनको मोडालिटीबारे सचिवालय बैठकले कुनै निर्णय गरेको थिएन । कति मन्त्री हटाउने, कति जना थप्ने विषयमा सहमति भएपछि मात्र पात्रको बारेमा छलफल हुनेछ ।
प्रतिक्रिया