काठमाडौं । नेपाली कांग्रेसले राष्ट्रियसभा निर्वाचनमा नेकपा एमालेसँग भएको सहमतिलाई चुनावी गठबन्धनका रूपमा बुझ्न नहुने बताएको छ । कांग्रेस प्रवक्ता देवराज चालिसेले राष्ट्रिय सभा निर्वाचनलाई चुनावी गठबन्धनको रुपमा बुझ्न नहुने बताएका छन् । उनले अघिल्लो केन्द्रीय कार्य समितिले गरेको सहमति कायम रहने स्पष्ट पारे ।
निर्वाचन आयोगले विशेष महाधिवेशनबाट चयन भएको नयाँ केन्द्रीय कार्यसमितिलाई मान्यता दिएपछि कांग्रेसको धारणा सार्वजनिक गर्दै सहमति कायम गरेर जाने निर्णय भएको चालिसेले बताएका हुन् ।
राष्ट्रिय सभाका १९ जना सदस्यको कार्यकाल आगामी फागुन २० मा सकिँदैछ । त्यसमध्ये नेकपाका नेता वामदेव गौतम राष्ट्रपतिबाट मनोनित सांसद हुन् । उनको ठाउँमा सरकारको सिफारिसमा अर्को व्यक्तिलाई राष्ट्रपतिले नै मनोनित गर्नेछन् । गौतमले अवधि केहीदन बाँकी छँदै राष्ट्रियसभा सदस्य पदबाट राजीनामा दिइसहेका छन् । उनलाई नेकपाले बर्दिया १ बाट चुनाव लडाउने भएको छ ।
बाँकी १८ पदका लागि गत पुस २३ मा मनोनयन भइसकेको छ । निर्वाचन आयोगका अनुसार १८ पदका लागि ४४ जनाले उम्मेदवारी दिएका छन् । जसमध्ये कांग्रेस, एमाले र जसपा नेपालले भागवण्डा गरेर क्रमश ९(८(१ सिटमा उम्मेदवारी दिएका छन् ।
राष्ट्रिय सभा सदस्यको निर्वाचनमा प्रदेश सभा सदस्य, गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख मतदाता हुन्छन् । सात वटै प्रदेशमा ५५० प्रदेश सभा सदस्य छन् । ७५३ स्थानीय तहका प्रमुख र उपप्रमुख गरी स्थानीय तहका पदाधिकारीतर्फ मात्रै एक हजार ५०६ मतदाता रहन्छन् ।
प्रतिक्रिया