संखुवासभामा बेलीबृज भाँचिँदा ट्रक अरुण नदी किनारमा खस्यो, चालक घाइते

संखुवासभा । संखुवासभाको मकालु गाउँपालिका-५ नुमबाट मकालु-२ सेदुवातर्फ जाँदै गरेको ट्रक अरुण नदी किनारमा खस्दा चालक घाइते भएका छन् ।

अरुण नदी पार गर्ने क्रममा रहेको बेलीबृज अचानक भाँचिएपछि ट्रक नदी किनारमा खसेको प्रहरीले जनाएको छ । दुर्घटनामा चालकको खुट्टा भाँचिनुका साथै टाउकोमा चोट लागेको बताइएको छ । घाइते चालकको उद्धार गरी उपचारका लागि नजिकको स्वास्थ्य संस्थामा लगिएको छ ।

स्थानीयका अनुसार उक्त क्षेत्रमा बेलीबृजको अवस्था कमजोर रहेकाले जोखिमपूर्ण यात्रा गर्नुपर्ने बाध्यता रहेको छ । बेलीबृज भाँचिँदा यातायात आवागमनसमेत प्रभावित भएको छ ।

यसअघि पनि मकालु-१ को वालुङ क्षेत्रमा रहेको बेलीबृज तर्ने क्रममा यस्तै प्रकारको दुर्घटना भएको थियो । स्थानीयले पुलको अवस्था सुधार गरी सुरक्षित आवागमनको व्यवस्था गर्न सम्बन्धित निकायसँग माग गरेका छन् ।