बुटवल । नेपाल पत्रकार महासंघ रुपन्देहीले आयोजना गरेको दोस्रो एफएनजे मिडिया कप तथा कर्पोरेट कप फुटसल प्रतियोगिताको उपाधि ग्लोबल आवाज र नेपाल युवा उद्यमी मञ्च रुपन्देहीले जितेको छ ।
७१ औं स्थापना दिवसको अवसरमा रुपन्देही शाखाले बुटवलमा सोमबार र मंगलबार आयोजना गरेको फुटसल प्रतियोगितामा दोश्रो दिन भएको मिडिया कपमा बुद्ध सामुदायिक टेलिभिजनलाई ३-२ गोल अन्तरले हराउँदै ग्लोबल आवाजले उपाधि जितेको हो ।
उपाधि जित्दै ग्लोबलले नगद २० हजारसहित शिल्ड, मेडल र प्रमाण पत्र प्राप्त गरेको छ । यस्तै उपविजेता बनेको बुद्ध सामुदायिक टेलिभिजनले नगद १५ हजारसहित शिल्ड,मेडल र प्रमाणपत्र प्राप्त गरेको छ ।
यस्तै आज नै भएको कर्फोरेट कपको खेलमा नेपाल इन्जिनियर्स एशोसियसन लुम्बिनी प्रदेशलाई २-० गोल अन्तरले पराजित गर्दै नेपाल युवा उद्यमी मञ्च रुपन्देहीले उपाधि जितेको छ । उपाधि जित्दै युवा उद्यमी मञ्चले ३० हजारसहित शिल्ड, मेडल र प्रमाण पत्र प्राप्त गरेको छ भने उपबिजेता बनेको इन्जिनियर्स एशोसियसनले २५ हजारसहित शिल्ड, मेडल र प्रमाण पत्र प्राप्त गरेको छ ।
प्रतियोगिता २ दिन सञ्चालन गरिएको हो । बुटवल उपमहानगरपालिकाको संरक्षकत्व नेपाल पत्रकार महासंघ रुपन्देहीको आयोजनामा दोस्रो एफएनजे मिडिया कप तथा कर्पोरेट कप फुटसल प्रतियोगिता २०८२ गरिएको हो ।
यस्तै मिडिया कप तर्फ उत्कृष्ट खेलाडीमा ग्लोबल आवाजका डिबी सुस्लिङ, सर्वाधिक गोलकर्तामा बुद्ध सामुदायिक टेलभिजनका स्वस्तिक श्रेष्ठ र उत्कृष्ट गोल रक्षकमा ग्लोबल आवाजका प्रकाश न्यौपाने बनेका छन ।
यस्तै कर्पोरेट कपमा सर्वाधिक गोलकर्तामा ईन्जिनियर्स एशोसियसनका क्रितेश श्रेष्ठ, उत्कृष्ट खेलाडीमा युवा उद्यमी मञ्चका मञ्जिल विक र उत्कृष्ट गोलरक्षकमा राहुल कौशधन भएका छन । प्रतियोगिताका उपाधि बिजेता, उपविजेता तथा खेलाडिहरुलाई बुटवल उपमहानगपालिकाका प्रमुख खेलराज पाण्डेय, महासंघ रुपन्देहीका अध्यक्ष दिनेश पाण्डेय, नेपाल प्रहरी लुम्बिनी प्रदेशका प्रमुख भूपेन्द्रबहादुर खत्री , ईलाका प्रहरी कार्यालय बुटवलका प्रमुख निशान्त श्रीवास्तव लगायतले पुरस्कार प्रदान गरेको प्रतियोगिताका संयोजक सुमनरश्मी श्रेष्ठले जानकारी दिए ।
यस्तै नेपाल पत्रकार महासंघ रुपन्देहीले स्थापना गरेको उत्कृष्ट खेलकुद पत्रकारिता पुरस्कार सुमन अधिकारीलाई प्रदान गरेको छ । जिल्लामा रहेर खेलकुद पत्रकारितामा योगदान गरेको भन्दै अधिकारीलाई नगद २५ हजारसहित सम्मान गरिएको महासंघका सचिब सिपी खनालले जानकारी दिए ।
प्रतिक्रिया