ललितपुर । ललितपुरको पाटनस्थित कृष्ण मन्दिर परिसरमा छुरा प्रहार गरी दुई दाजुभाइको हत्या भएको छ । पाँचथर घर भई हाल इमाडोल बस्दै आएका ३३ वर्षीय सुमीत नेम्बाङ र उनका २६ वर्षीय भाइ सिर्जन नेम्बाङको मृत्यु भएको प्रहरीले जनाएको छ ।
प्रहरीका अनुसार उनीहरूमाथि सञ्जीव नेपालीले धारिलो हतियार प्रहार गरेका हुन् । घटनापछि भाग्ने क्रममा प्रहरीले सञ्जीवसहित दुई जनालाई पक्राउ गरिसकेको छ ।
प्रारम्भिक अनुसन्धानअनुसार बुधबार साँझ नेम्बाङ दाजुभाइले फोन गर्ने क्रममा झुक्किएर सञ्जीवको नम्बरमा सम्पर्क पुगेको थियो । एक-आपसमा अपरिचित उनीहरूबीच सुरुमा सामान्य कुराकानी भए पनि पछि सोही विषयलाई लिएर विवाद बढेको प्रहरीले जनाएको छ ।
फोनमै विवाद चर्किएपछि सञ्जीवले नेम्बाङ दाजुभाइलाई पाटन बोलाएका थिए । इमाडोलबाट पाटन पुगेलगत्तै मासु पसलमा काम गर्ने सञ्जीवले मासु काट्न प्रयोग हुने हतियारले प्रहार गरेको ललितपुर प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया