बुटवल । रुपन्देहीको सिद्धार्थनगरस्थित क्यासिनोमा जुवा खेलिरहेको अवस्थामा १९ नेपाली नागरिक पक्राउ परेका छन् ।
सिद्धार्थनगर नगरपालिका-१० मा रहेको होटेल गौतम बुद्ध इन्टरनेशनलभित्र सञ्चालित रोयल कालिङ्गा क्यासिनोबाट मंगलबार राति करिब ८ बजे लुम्बिनी प्रदेश प्रहरी कार्यालय दाङ र जिल्ला प्रहरी कार्यालय रुपन्देहीको संयुक्त टोलीले छापा मार्दा उनीहरू पक्राउ परेका हुन् ।
प्रहरीका अनुसार पक्राउ पर्नेमा क्यासिनो म्यानेजरसहित जुवा खेलाउने ४ जना र जुवा खेल्ने १५ जना रहेका छन् ।
जिल्ला प्रहरी कार्यालय रुपन्देहीका सूचना अधिकारी कृष्णकुमार चन्दका अनुसार पक्राउ पर्नेहरूमा सिद्धार्थनगर नगरपालिका-६ गल्लामण्डीका २२ वर्षीय अभय कुमार गुप्ता, वडा नं. २ का २६ वर्षीय सुशान्त अधिकारी, वडा नं. १३ का २८ वर्षीय सन्जय शाक्य र ओमसतिया गाउँपालिका-२ का २९ वर्षीय निक्षेन्द नेपाल रहेका छन् ।
यसैगरी काठमाडौंका ५० वर्षीय जीवन थापा, रुपन्देहीका ३२ वर्षीय आकाश गुप्ता, ३३ वर्षीय सुनारी मगर, २९ वर्षीय अब्दुल कलाम जोलहा, ५८ वर्षीय अभिषेक शर्मा, ४४ वर्षीय शिव पाण्डे, ३४ वर्षीय रोहन वि.क. (तिल बहादुर वि.क.), २१ वर्षीय सुरज जयसवाल, १८ वर्षीय रमेश यादव, ३८ वर्षीय निर्मल बस्याल र ३० वर्षीय भरत थापा पनि पक्राउ परेका छन् ।
त्यसैगरी गुल्मीका नेत्र पोख्रेल, ललितपुरका ५० वर्षीय बाबुराजा महर्जन र पर्साको वीरगञ्ज महानगरपालिका-७ का ४४ वर्षीय जंगकुमार अग्रवाल पनि पक्राउ परेका छन् ।
उनीहरूको साथबाट ९५ हजार ५ सय रुपैयाँ नगद, विभिन्न कम्पनीका १७ थान मोबाइल सेट र ५० थान क्यासिनो क्वाइन बरामद भएको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया