काठमाडौं । नेपाली कांग्रेसका संसदीय दलका नेता भिष्मराज आङदेम्बेले संसदको मर्यादा कायम नराखेकोमा गम्भीर आपत्ति प्रकट गरेका छन् ।
मंगलबारको प्रतिनिधिसभा बैठकमा बोल्दै आङदेम्बेले सरकारको पछिल्लो कार्यशैलीले संसद्को गरिमा र लोकतान्त्रिक मूल्य मान्यतामाथि गम्भीर चोट पुगेको बताएका ।
राष्ट्रप्रमुखले सम्बोधन गरिरहेको समयमा प्रधानमन्त्री बाहिरिनु आपत्तिजनक र खेदजनक भएको बताएका हुन् । उनले प्रधानमन्त्री बीचैमा उठेर हिँड्नुको कारण स्वास्थ्य हो भने प्रधानमन्त्रीको स्वास्थ्यपरीक्षण गरेर यथाशिघ्र संसदलाई जानकारी गराउन उनले माग गरे । उनले प्रधानमन्त्रीले संसद र संसदका समितिलाई समेत वेवास्ता गरेको भन्दै रोष प्रकट गरे ।
उनले सरकारले संसद् बोलाइसकेपछि अध्यादेशमार्फत शासन सञ्चालन गर्न खोजेको भन्दै त्यसले संसद्प्रतिको सरकारी निष्ठामाथि नै प्रश्न उठाएको बताए । “हामी अध्यादेशको पहिरो लागेको भीरको डिलमा उभिएका छौं । यस्तो अस्वाभाविक शासन शैलीलाई कांग्रेसले समर्थन गर्न सक्दैन,” उनले भने ।
आङ्देम्बेले सरकारले जनतासँग प्रत्यक्ष संवाद गर्नुपर्नेमा सामाजिक सञ्जालमार्फत मात्रै उपस्थित देखिएको टिप्पणी गरे । सरकारलाई सामाजिक सञ्जालमा खोज्नुपर्ने अवस्था सिर्जना हुनु लोकतान्त्रिक अभ्यासका लागि सुखद नभएको उनको भनाइ थियो ।
उनले सरकारलाई रचनात्मक सहयोग गर्न कांग्रेस तयार रहेको दोहोर्याउँदै परिणाममुखी कामको अपेक्षा गरिएको बताए । “कांग्रेस ठूलो कुरा गर्ने तर परिणाम नदिने शैलीको पक्षमा छैन, हामी काम र नतिजा खोजिरहेका छौं,” उनले भने ।
पूर्वगृहमन्त्री सुधन गुरुङ माथि लागेको भ्रष्टाचारसम्बन्धी आरोपमा छानबिन नभएको विषय उठाउँदै आङ्देम्बेले सरकारको सुशासनमाथि प्रश्न गरे । अरूमाथि भ्रष्टाचारको आरोप लगाएर राजनीतिक रूपमा खेद्ने तर आफ्नै पूर्वगृहमन्त्रीमाथि लागेको गम्भीर आरोपमा अनुसन्धान नगर्नु दोहोरो मापदण्ड भएको उनले बताए ।
त्यसैगरी उनले सुकुम्बासी बस्तीमा डोजर चलाएर नागरिकलाई आतंकित बनाइएको आरोप लगाए । जनताको अभिभावक बन्नुपर्ने सरकार दमनकारी शैलीमा प्रस्तुत भएको भन्दै उनले संगठित बस्तीमाथि हठात् डोजर चलाउनु उचित नभएको धारणा राखे ।
प्रतिक्रिया