काठमाडौं । श्रम संस्कृति पार्टीका अध्यक्ष तथा सांसद हर्कराज राईले सरकार संसद्प्रति जवाफदेही नभएको आरोप लगाउँदै आफ्नो पार्टीको विरोध कार्यक्रम निरन्तर जारी रहने बताएका छन् ।
बुधबार बसेको प्रतिनिधिसभा बैठकमा बोल्दै उनले आगामी आर्थिक वर्ष २०८३/०८४ को नीति तथा कार्यक्रममाथिको छलफलमा प्रधानमन्त्री र सम्बन्धित मन्त्रीहरू अनुपस्थित रहने प्रवृत्तिप्रति आपत्ति जनाए । संसद् जनताको आवाज र प्रश्न उठाउने थलो भएकाले सरकार त्यसप्रति अनिवार्य रूपमा उत्तरदायी हुनुपर्ने उनको भनाइ थियो ।
सांसद राईले सदन सञ्चालन भएको सातौँ दिनसम्म पनि आफ्नो पार्टीले पर्चा र पम्प्लेटसहित निरन्तर विरोध गरिरहेको उल्लेख गर्दै सरकार जिम्मेवार नबन्दासम्म आन्दोलन नरोकिने चेतावनी दिए ।
उनले संसद्को नियमावली सरकारका हकमा प्रभावकारी रूपमा कार्यान्वयन नभएको टिप्पणी गर्दै प्रधानमन्त्रीदेखि मन्त्रीहरूसम्म संसद्बाटै उत्पन्न भएकाले सदनप्रति जवाफदेही हुनुपर्ने धारणा राखे ।
त्यसैगरी, प्रधानमन्त्री र मन्त्रीहरूलाई संसद्मा उपस्थित गराउन सभामुख डोलप्रसाद अर्यालले रुलिङ गर्नुपर्ने माग पनि उनले गरेका छन् ।
प्रतिक्रिया