काठमाडौं । नेपाल कम्युनिस्ट पार्टी (नेकपा)का सांसद वर्षमान पुनले सरकारले आगामी आर्थिक वर्षका लागि प्रस्तुत गरेको बजेट यथार्थपरक नभई अत्यधिक ठूलो र वितरणमुखी रहेको टिप्पणी गरेका छन्।
शुक्रबार अर्थमन्त्री स्वर्णिम वाग्लेले संघीय संसद्मा बजेट प्रस्तुत गरेपछि सञ्चारकर्मीसँग प्रतिक्रिया दिँदै पुनले बजेटको आकार वास्तविक आर्थिक क्षमताभन्दा बाहिर गएर निर्धारण गरिएको दाबी गरे।
उनका अनुसार राष्ट्रिय योजना आयोगले करिब २० खर्ब रुपैयाँको बजेट सीमा तय गरेको भए पनि सरकारले त्यसमा ठूलो रकम थपेर बजेटको आकार अनावश्यक रूपमा विस्तार गरेको छ। उनले विगतका बजेटहरू पनि अनुमानभन्दा कम कार्यान्वयन हुने गरेको उल्लेख गर्दै यस वर्ष पनि प्रस्तुत गरिएको बजेट ‘फुलेको बजेट’ जस्तै देखिएको बताए।
“बजेट मिश्रित प्रकृतिको छ। आकार अत्यधिक ठूलो बनाइएको छ र वास्तविकतासँग मेल खाँदैन,” पुनले भने, “अघिल्ला वर्षहरूमा पनि १८–१९ खर्ब रुपैयाँको बजेट ल्याइए तापनि वास्तविक खर्च १६–१७ खर्ब रुपैयाँको हाराहारीमा सीमित हुने गरेको थियो। अहिले पनि त्यही प्रवृत्ति दोहोरिएको देखिन्छ।”
सांसद पुनले सरकारले विभिन्न क्षेत्रका लागि कर छुट, अनुदान तथा सामाजिक सुरक्षा कार्यक्रम विस्तार गर्ने घोषणा गरेको उल्लेख गर्दै यस्ता कार्यक्रम उद्देश्यका दृष्टिले सकारात्मक भए पनि मुलुकको वर्तमान आर्थिक अवस्थाले त्यसको भार थेग्न नसक्ने बताए।
उनले विगतमा वामपन्थी नेतृत्वका अर्थमन्त्रीहरूले वितरणमुखी बजेट ल्याएको भन्दै आलोचना खेप्ने गरेको स्मरण गराउँदै वर्तमान बजेटमा पनि त्यही प्रवृत्ति देखिएको टिप्पणी गरे। अर्थमन्त्री स्वर्णिम वाग्लेले अघिल्ला बजेटहरूलाई ‘कनिका छरेजस्तो’ भन्दै आलोचना गर्ने गरेका थिए ।
प्रतिक्रिया