नवलपरासी(सुस्तापश्चिम) । नवलपरासी (सुस्तापश्चिम)को सुस्तामा नेपाली भूमीमा आएर नेपालीहरुलाई धम्की दिएपछि सुस्ताबासीले भारतीय अर्धसैनिक बल सशस्त्र सीमा बल (एसएसबी)को टोलीलाई सीमा कटाएका छन् ।
नारायणी नदीले सीमास्तम्भ कटान गरेपछि कृतिम सीमानाका मानिएको सिमलको रुख भन्दा झण्डै १ किलोमिटर वर नेपाली भूमीमा एसएसबीको गस्ती आएपछि सुस्ताबासीले प्रतिकार गरेको सुस्ता बचाउ अभियानका अभियन्ता योगेन्द्र गौतमले बताए । नेपाली भूमीमा हातहतियार सहित प्रवेश गरेका एसएसबीका जवानहरुलाई नेपाली भूमीमा प्रवेशको बारेमा प्रश्न गर्दा बन्दुक ताकेपछि स्थानीयबासीले प्रतिकार गरेको गौतमले बताए ।
उनले सीमानाका मानिएको सिमलको रुख भन्दा १ कलिोमिटर नेपाल तर्फ नियमित गस्ती गर्नेगरि भारतीय सुरक्षा बलले तयारी गरेपछि सुस्ताबासीले प्रतिरोध गरेको बताए ।
यता लुम्बिनी प्रदेश प्रहरी कार्यालयले स्थानीयबासीसँग विवाद नभएको जनाउँदै एसएसबीको गस्तीका क्रममा नेपाली भूमी भएर पुनः भारत तर्फ प्रस्थान गरेको जनाएको छ । लुम्बिनी प्रदेश प्रहरी कार्यालयका प्रवक्ता वरिष्ठ प्रहरी उपरीक्षक शारदा प्रसाद चौधरीले एसएसबीको गस्तीको क्रममा नेपाली भूमी हुँदै पुनः भारत फर्केको स्वीकार गरे । उनले स्थानीयसँगको विवाद बारे कुनै जानकारी नआएको बताए । ‘सामाजिक सञ्जालमा आएका फोटो एआई होला, कुनै विवाद भनाभन भएको होईन ।’ उनले भने ।
जिल्ला प्रहरी कार्यालय नवलपरासी(सुस्तापश्चिम)ले पनि नेपाली भूमीमा एसएसबीको गस्ती हिँडेको स्वीकार गरेको छ । एउटा पोस्टबाट अर्को पोस्टमा जाने क्रममा नेपाली भूमी प्रयोग भएको नवलपरासी(सुस्तापश्चिम) प्रहरी प्रवक्ता प्रहरी नायव उपरीक्षक मदन थापाले बताए । नेपाली भूमी भएर भारत कै अर्को पोस्टमा जाने क्रममा नेपालको भूमी प्रयोग भएपछि खेतमा काम गरिरहेका स्थानीयले बिरोध जनाएको डीएसपी थापाले बताए ।
प्रतिक्रिया