सन् २०२१ मा नेपालको आर्थिक वृद्धिदर ०.६ प्रतिशत रहने विश्व बैंकको प्रक्षेपण

काठमाडौं । विश्व बैंकले सन् २०२१ मा नेपालको आर्थिक वृद्धिदर ० दशमलव ६ प्रतिशत पुग्ने प्रक्षेपण गरेको छ ।

विश्व बैंकको पछिल्लो दक्षिण एसियास्तरीय आर्थिक प्रतिवेदनले आगामी वर्ष नेपालको आर्थिक वृद्धिदर ० दशमलव ४ प्रतिशतले वृद्धि भै ० दशमलव ६ प्रतिशतमा पुग्ने अनुमान गरेको हो ।

कोरोनाभाइरस महामारीका कारण गरिएको लकडाउनले पर्यटन क्षेत्रमा पुर्याएको गम्भीर असरका कारण सन् २०२० को आर्थिक वृद्धिदर ० दशमलव २ प्रतिशतमा खुम्चिने अनुमान विश्व बैंकको रहेको छ ।

बैंकले बिहीबार सार्वजनिक गरेको अपडेट अनुसार यसवर्ष नेपाल मात्र नभएर सिंगो दक्षिण एशिया नै गहिरो आर्थिक मन्दीमा डुबेको जनाएको छ । यस क्षेत्रमा अनौपचारिक क्षेत्रमा काम गर्ने कामदारहरु सबैभन्दा मारमा परेका छन् । लाखौंले रोजगारी गुमाएका कारण दक्षिण एशियाबासीहरु झन बढी गरिबीमा धकेलिँदै गएको विश्व बैंकले निस्कर्ष निकालेको छ ।

माल्दिभ्स, श्रीलंका र नेपालका लागि विश्व बैंकका राष्ट्रिय निर्देशक फारिस हदाद जर्भोसले कोरोना महामारीले अर्थतन्त्रमा पारेको प्रभाव र त्यसले नेपालका मानिसको जीविकोपार्जनमा पारेको असरले अनौपचारिक कामदार वा सामाजिक सुरक्षा र सहायतामा नसमेटिएका मानिसहरूलाई सबैभन्दा गम्भीर असर पर्ने जनाएका छन् ।

ती मानिसहरु चरम गरिबीमा धकेलिने सम्भावना रहेको जर्भोसले बताए। राज्यले उनीहरूलाई तत्काल आय, सामाजिक सुरक्षा, र रोजगारीसहितको सहयोग उपलब्ध गराउनुपर्ने आवश्यकता रहेको उनले जनाएका छन् ।

पछिल्लो ५ वर्षमा दक्षिण एशियाको आर्थिक वृद्धिदर वार्षिक ६ प्रतिशतको हाराहारीमा थियो । तर, सन् २०२० मा ७ दशमलव ७ प्रतिशतले आर्थिक संकुचन हुने आंकलन गरिएको छ । सन् २०२१ मा क्षेत्रीय वृद्धिदर ४दशमलव ५ प्रतिशत रहने अनुमान विश्व बैंकले गरेको छ ।