काठमाडौं । काठमाडौं उपत्यकाको विभिन्न स्थानबाट मोटरसाइकल चोरी गरेको घटनामा संलग्न रहेको अभियोगमा ५ जनालाई प्रहरीले पक्राउ गरेको छ ।
पक्राउ पर्नेहरूमा काठमाडौं महानगरपालिका-१५ स्वयम्भू बस्ने ललितपुर माहाङ्काल गाउँपालिका-३ घर भएका २९ वर्षीय राजकुमार परियार, ललितपुर बाग्मती गाउँपालिका-५ घर भएका २४ वर्षीय सविन भुलन, ललितपुर महानगरपालिका-५ चापागाउँ बस्ने माहाङ्काल गाउँपालिका-५ घर भएका ३३ वर्षीय ईन्द्र बहादुर वाईबा, ललितपुर माहाङ्काल गाउँपालिका-५ बस्ने काभ्रेपलाञ्चोक बेथानचौर गाउँपालिका-२ घर भएका २४ वर्षीय अनिल योञ्जन र काठमाडौं महानगरपालिका-१४ कलंकी बस्ने रौतहट चन्द्रपुर नगरपालिका-२ घर भएका २९ वर्षीय पञ्चलाल ब्लोन रहेका छन् ।
काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले राजकुमार र सविनलाई काठमाडौं कालिमाटीबाट शुक्रबार तथा ईन्द्र बहादुरलाई ललितपुर महानगरपालिका-५ बाट, अनिललाई ललितपुर माहाङ्काल गाउँपालिका-५ र पञ्चलाललाई काठमाडौं कलंकीबाट आइतबार पक्राउ गरेको हो । प्रहरीले उनीहरूको साथबाट ४ थान मोटरसाइकल बरामद गरेको छ ।
उनीहरूलाई थप आवश्यक अनुसन्धान एवम् कारबाहीको लागि जिल्ला प्रहरी परिसर काठमाडौं र प्रहरी वृत्त कालिमाटी पठाइएको छ ।
प्रतिक्रिया