काठमाडौं । त्रिपुरेश्वरमा आफ्नै शरीरमा आगो लगाएर गम्भीर घाइते भएका गणेश नेपालीको उपचारका क्रममा निधन भएपछि उनका आफन्तले आन्दोलनको चेतावनी दिएका छन् । उनीहरूले घटनाको निष्पक्ष छानबिन, दोषीमाथि कारबाही तथा पीडित परिवारलाई न्यायको माग गर्दै शव बुझ्न अस्वीकार गरेका छन् ।
मुगुको सोरु गाउँपालिका-१ का २५ वर्षीय गणेश नेपालीले बिहीबार त्रिपुरेश्वरस्थित राहदानी विभाग अगाडि आफ्नै शरीरमा आगो लगाएका थिए । गम्भीर जलन भएका उनको वीर अस्पतालमा उपचार भइरहेको थियो । अस्पताल स्रोतका अनुसार भेन्टिलेटरमा उपचाररत नेपालीको शुक्रबार बिहान ११ बजेर २० मिनेटमा निधन भएको हो ।
नेपालीको मृत्यु भएपछि अस्पताल पुगेका आफन्तहरूले घटनाका दोषीमाथि कारबाही नभएसम्म शव नबुझ्ने अडान लिएका छन् । एक आफन्तले “न्याय नपाए शव बुझ्दैनौँ, आन्दोलनमा जान्छौँ” भन्दै सरकारसँग घटनाको सत्यतथ्य सार्वजनिक गर्न माग गरेका छन् ।
आफन्तहरूले गणेशमाथि अन्याय भएको दाबी गर्दै घटनामा संलग्न पक्षको जिम्मेवारी निर्धारण हुनुपर्ने बताएका छन् । उनीहरूले पीडित परिवारलाई उचित क्षतिपूर्ति र राज्यबाट सहयोगको व्यवस्था गर्न पनि माग गरेका छन् ।
अर्का आफन्त चन्द्रबहादुर शाहीका अनुसार गणेश नेपाली तीन-चार वर्षअघि रोजगारीको खोजीमा काठमाडौं आएका थिए । उनले किस्तामा मोटरसाइकल खरिद गरी राइड सेयरिङ सेवामार्फत जीविकोपार्जन गर्दै आएका थिए ।
शाहीका अनुसार बिहीबार निषेधित क्षेत्रमा मोटरसाइकल पार्क गरेको भन्दै काठमाडौं महानगरपालिकाको नगर प्रहरीले उनीमाथि १० हजार रुपैयाँ जरिवानाको चिट काटेको थियो । घटनापछि आक्रोशित बनेका आफन्तहरूले नगर प्रहरीको भूमिकामाथि समेत प्रश्न उठाउँदै घटनाबारे निष्पक्ष छानबिन हुनुपर्ने माग गरेका छन् ।
घटनापछि वीर अस्पताल परिसरमा आफन्त र शुभेच्छुकहरूको भीड लागेको छ भने सुरक्षा व्यवस्था पनि कडा पारिएको छ ।
प्रतिक्रिया