काठमाडौं। झण्डै डेढ महिनापछि प्रधानमन्त्री बालेन्द्र शाह प्रतिनिधिसभा बैठकमा केहीबेरका लागि उपस्थित भएका छन् ।
मंगलबारको बैठकमा प्रधानमन्त्री शाह आफ्नो पार्टी राष्ट्रिय स्वतन्त्र पार्टी (रास्वपा)का सभापति रवि लामिछानेसहित प्रवेश गरेका थिए ।
तर, संसद बैठक चलिरहेकै बेला उनीहरू सभामुखको आसन र बोलिरहेका सांसदबीचको स्थानबाट प्रवेश गरेपछि नेकपा (एमाले)ले नियम उल्लंघन भएको भन्दै नियमापत्ति जनाएको छ । एमाले सचेतक ऐनबहादुर महरले संसदको मर्यादा र नियमावलीको उल्लंघन भएको भन्दै सभामुखको ध्यानाकर्षण गराएका थिए।
प्रधानमन्त्री संसदमा करिब २० मिनेटसम्म बसेपछि बैठक छाडेर बाहिरिएका छन् । सदनमा प्रवेश गर्नुअघि प्रधानमन्त्रीले सभामुखसँग करिब पाँच मिनेट छलफल गरेका थिए।
प्रतिनिधिसभा बैठकमा प्रतिपक्षी दलहरूले प्रधानमन्त्री संसदमा अनिवार्य उपस्थित हुनुपर्ने, सांसदहरूले उठाएका समसामयिक प्रश्नहरूको जवाफ दिनुपर्ने तथा संसदप्रति सरकार जिम्मेवार बन्नुपर्ने माग दोहोर्याउँदै आएका छन्।
प्रतिक्रिया