कैलाली । धनगढीमा शरीरमा पेट्रोल छर्केर आत्मदाहको प्रयास गरेकी एक युवतीको मृत्यु भएको छ । मृत्यु हुनेमा धनगढी उपमहानगरपालिका-७ की ३५ वर्षीया ज्योति चौधरी रहेको जिल्ला प्रहरी कार्यालय कैलालीले जनाएको छ ।
जिल्ला प्रहरी कार्यालयका प्रहरी निरीक्षक कैलाश विष्टका अनुसार चौधरीले आइतबार साँझ आफ्नै घरभित्र शरीरमा पेट्रोल छर्केर आगो लगाएकी थिइन् । आगलागीबाट गम्भीर घाइते भएकी उनलाई आफन्तले तत्काल उद्धार गरी सेती प्रादेशिक अस्पताल पुर्याएका थिए ।
चिकित्सकका अनुसार उनको शरीरको करिब ६० प्रतिशत भाग जलेको थियो । अवस्था गम्भीर भएपछि थप उपचारका लागि भेरी अस्पताल नेपालगञ्ज लैजाने तयारी गरिएको थियो ।
तर, आफन्तले उनलाई उपचारका लागि काठमाडौं लैजाने क्रममा सोमबार बिहान करिब ७ बजे धादिङ पुगेपछि बाटोमै मृत्यु भएको प्रहरी निरीक्षक विष्टले जानकारी दिए ।
प्रहरीका अनुसार मृतकको शव कैलाली ल्याउने प्रक्रिया अघि बढाइएको छ भने घटनाको विषयमा थप अनुसन्धान भइरहेको छ ।
प्रतिक्रिया