काठमाडौं । अमेरिकाको फ्लोरिडास्थित मियामी अन्तर्राष्ट्रिय विमानस्थलमा अमेजन एयरको कार्गो विमान अवतरणका क्रममा दुर्घटना हुँदा कम्तीमा पाँचजनाको मृत्यु भएको छ । दुर्घटनामा पाँचजना घाइते भएका छन् ।
पोर्टो रिकोको सान जुआनस्थित लुइस मुनोज मारिन अन्तर्राष्ट्रिय विमानस्थलबाट उडेको बोइङ ७६७-३०० कार्गो विमान स्थानीय समयअनुसार आइतबार दिउँसो करिब २ बजे मियामी अन्तर्राष्ट्रिय विमानस्थलमा अवतरण गर्ने क्रममा रनवेबाट बाहिरिएको थियो ।
विमान करिब २०९ किलोमिटर प्रतिघण्टाको गतिमा रनवेबाट बाहिरिएको बताइएको छ । रनवेबाट बाहिरिएपछि विमानले कैयौँ सवारीसाधनलाई ठक्कर दिएको थियो । त्यसपछि विमानमा भीषण आगलागी भएको थियो । विमानको अगाडिको भाग धसिने गरी रोकिएको थियो ।
दुर्घटनालगत्तै आगो नियन्त्रण तथा उद्धारका लागि करिब २०० जना अग्निनियन्त्रक परिचालन गरिएको थियो । उद्धार टोलीले विमानमा लागेको आगो नियन्त्रणमा लिनुका साथै घाइतेहरूको उद्धार गरेको थियो ।
घाइते पाँचजनामध्ये तीनजनालाई गम्भीर अवस्थामा स्थानीय ट्रमा सेन्टरमा भर्ना गरिएको छ भने अन्य दुईजनालाई नजिकैको अस्पतालमा उपचारका लागि लगिएको छ ।
दुर्घटनापछि अमेजनकी प्रवक्ता केली नान्टेलले विज्ञप्तिमार्फत घटनाप्रति गहिरो दुःख व्यक्त गरेकी छन् । उनले मृतकका परिवार तथा दुर्घटनाबाट प्रभावित सबैप्रति अमेजनका तर्फबाट समवेदना व्यक्त गरेकी छन् ।
दुर्घटनाको कारणबारे सम्बन्धित निकायले अनुसन्धान सुरु गरेका छन् । बीबीसी
प्रतिक्रिया