गुल्मी । सम्भावित भारी वर्षाका कारण गुल्मीको कालीगण्डकी गाउँपालिकाले गाउँपालिकाभित्रका विद्यालय दुई दिन बन्द गर्ने निर्णय गरेको छ ।
गाउँपालिकाले जारी गरेको सूचनाअनुसार नेपाल मौसम विज्ञान विभाग, मौसम पूर्वानुमान महाशाखाले असोज ८, ९, १० र ११ गते नेपालका विभिन्न स्थानमा मेघगर्जन, चट्याङ र हावाहुरीसहित भारीदेखि अति भारी वर्षाको सम्भावना रहेको तथा विपद्को उच्च जोखिम हुनसक्ने पूर्वानुमान गरेको छ ।
उक्त मौसम पूर्वानुमानलाई मध्यनजर गर्दै विद्यार्थी तथा शिक्षकको सुरक्षालाई ध्यानमा राखी गाउँपालिकाभित्र सञ्चालित विद्यालयहरूमा असोज ८ गते बिहीबार र ९ गते शुक्रबार दुई दिन पठनपाठन बन्द गर्ने निर्णय गरिएको गाउँपालिकाले जनाएको छ ।
गाउँपालिकाको शिक्षा शाखाका अनुसार प्रतिकूल मौसमका कारण हुनसक्ने सम्भावित जोखिम न्यूनीकरण तथा विद्यार्थीको सुरक्षाका लागि विद्यालय बन्द गर्ने निर्णय गरिएको हो ।
गाउँपालिकाले सम्बन्धित विद्यालय, शिक्षक, विद्यार्थी तथा अभिभावकलाई उक्त निर्णयअनुसार विद्यालय बन्द गरी आवश्यक सतर्कता अपनाउन आग्रह गरेको छ ।
प्रतिक्रिया