काठमाडौं । प्रमुख प्रतिपक्षी दल नेपाली काँग्रेसले केन्द्रीय कार्यसमिति बैठक बोलाएको छ ।
कात्तिक २१ गते बस्ने गरी कार्यसमिति बैठक बोलाइएको काँग्रेस पार्टी कार्यालयका मुख्यसचिव कृष्णप्रसाद पौडेलले जानकारी दिएका छन् ।
पार्टीको आगामी १४ औँ महाधिवेशनको तयारी सन्दर्भमा हुने उक्त बैठकमा केन्द्रीय कार्यसमितिका पदाधिकारी, केन्द्रीय सदस्यहरु तथा आमन्त्रित केन्द्रीय सदस्यलाई उपस्थित हुने पार्टीले अनुरोध गरेको छ ।
कोरोना भाइरसको महामारी बढेका कारण काँग्रेसले गत असोज १९ गतेका लागि बोलाएको बैठक स्थगित गरेको थियो । बैठकको पूर्वसन्ध्यामा गरिएको पीसीआर परीक्षणमा पार्टीका कतिपय केन्द्रीय नेतालार्ई कोरोना संक्रमण पुष्टि भएपछि सो बैठक स्थगित भएको थियो ।
बैठकमा १४ औं महाधिवेशनको विषयमा छलफल हुने बताइएको छ । काँग्रेसभित्र सभापति शेरबहादुर देउवाले मनमौजी गरेको आरोप वरिष्ठ नेता रामचन्द्र पौडेल पक्षधरले लगाउँदै आएको छ ।
प्रमुखप्रतिपक्षी दल काँग्रेसले बैठक बोलाएको एक दिन अघि सत्तारुढ नेपाल कम्युनिष्ट पार्टी नेकपाले भने केन्द्रीय कमिटी बैठक पुनः स्थगित गरेको जनाएको थियो ।
पार्टीभित्र अध्यक्षद्वय केपी शर्मा ओली र पुष्पकमल दाहाल प्रचण्डबीच पुनः विवाद बल्झिएकै अवस्थामा केन्द्रीय कमिटी बैठक स्थगित गरिएको हो । नेकपाले बैठक स्थगित गर्नाको कारण पुनः कोरोना भाइरसको संक्रमणलाई नै देखाएको छ ।
प्रतिक्रिया