काठमाडौं । नेपाल टेलिकमले फाइबर टु द होम सेवामार्फत टेलिभिजन सुविधा उपलब्ध गराउने तयारी गरेको छ ।
टेलिकमले बिहीबार एक विज्ञप्ति प्रकाशित गर्दै तामाको तारबाट चल्ने ल्याण्डलाइन टेलिफोनलाई एफटीटीएच अर्थात फाइबर टु द होम सेवाले विस्थापित गरी भ्वाइस तथा डाटा सेवा उपलब्ध गराइरहेको जनाउँदै एफटीटीएच सेवाप्रतिको आकर्षणमा निरन्तर वृद्धि हुने अपेक्षा गरेको छ ।
एफटीटीएच सेवालाई विद्युत आपूर्ति अवरुद्धको अवस्थामा पनि निरन्तरता दिन सानो खालको राउटर यूपीएस वा एडेप्टर प्रयोग गर्न पनि सुझाव दिएको छ । टेलिकमको विज्ञप्तिमा भनिएको छ, ‘राउटर यूपीएस जस्ता साना डिभाइस विभिन्न क्षमताका हुन्छन् र विद्युत नभएको समयमा केही घण्टासम्म सेवाको निरन्तरताका लागि उपयुक्त हुन्छन् ।’ एडेप्टरमा भने त्यसमा भएको ब्याट्री विद्युत उपलब्ध भएको समयमा आफैं चार्ज हुन्छ र विद्युत नभएको समयमा त्यही ब्याकअप पावर खपत हुन्छ ।
कम्पनीले वितरण गरिरहेको एफटीटीएच सेवाका लागि १२ भोल्ट र एक एम्पियर क्षमताको एडेप्टर उपयुक्त हुने भएकाले ग्राहकवर्गले आफ्नो आवश्यकता तथा सहजता अनुसार खरिद गरी प्रयोग गर्न उपयुक्त हुने टेलिकमले सुझाव दिएको छ ।
टेलिकमले एफटीटीएच सेवामा विभिन्न प्याकेजहरु आकर्षक दरमा उपलब्ध गराइरहेको छ । प्राविधिक रुपले सम्भव हुने स्थानहरुमा पुरानो ल्याण्डलाइन फोनलाई एफटीटीएच प्याकेजअन्तर्गत एक थान वाइफाई राउटर (सीपीई) र एक सय मिटर ड्रप फाइबर निःशुल्क उपलब्ध गराई नयाँ एफटीटीएच जडान गर्दै आएको छ । यसका लागि ग्राहकले नजिकको दूरसञ्चार कार्यालयमा सम्पर्क गर्नुपर्ने टेलिकमले जनाएको छ ।
उच्च गतिको इन्टरनेट र भिडियो सेवाहरु, टेलिफोन सेवा र भविष्यमा टेलिभिजन समेत उपलब्ध भए पश्चात् ग्राहकवर्गका लागि कम्पनीको ट्रिपल प्ले सुविधा थप आकर्षक हुने विश्वास टेलिकमले गरेको छ ।
प्रतिक्रिया