भरतपुर अस्पतालमा थप दुई जना कोरोना संक्रमितको मृत्यु

चितवन । चितवनका भरतपुर अस्पतालमा उपचाररत दुई जना कोरोना संक्रमितको मृत्यु भएको छ ।

शुक्रबार बिहान ५:१५ बजे भरतपुर महानगरपालिका वडा नं. १७ का ५७ वर्षीय पुरुषको मृत्यु भएको छ । निमोनियाको समस्या भएपछि उपचारका लागि अस्पताल पुगेका उनको यही मंसिर ३ गते पीसीआर परीक्षण गरिएको थियो ।

४ गते कोरोना संक्रमण पुष्टि भएपछि उनलाई मंसिर ५ गते अस्पताल भर्ना गरिएको थियो । स्वास्थ्य अवस्था बिग्रिँदै गएपछि उनलाई अस्पतालको आईसीयूमा राखेर उपचार गर्दागर्दै आज बिहान मृत्यु भएको अस्पतालमा सूचना अधिकार लिलाधर पौडेलले बताएका छन् ।

यसैगरी, भरतपुर अस्पतालमै उपचाररत हेटौंडा उपमहानगरपालिका वडा नं. १० की ५७ वर्षीया कोरोना संक्रमित महिलाको पनि मृत्यु भएको छ ।

कोरोना संक्रमण पुष्टि भएपछि बिहीबार अस्पताल भर्ना भएकी ती महिलाको आज शुक्रबार बिहान ६ बजे मृत्यु भएको सूचना अधिकारी पौडेलले जानकारी दिए । उनलाई गत मंसिर ८ गते नै कोरोना पुष्टि भएको थियो ।

अस्पतालमा भर्ना भएलगत्तै उनलाई पनि आईसीयूमा नै राखेर उपचार सुरु गरिएको थियो ।