काठमाडौ । सत्तारुढ नेपाल कम्युनिष्ट पार्टी (नेकपा)मा शिर्ष नेतृत्वबीच चरम अन्तसंघर्ष चर्किँदै जाँदा त्यसको प्रभाव पार्टीको तल्ला निकाय र जनवर्गीय संगठनमा स्पष्टसँग देखिन थालेको छ ।
प्रधानमन्त्री एवं अध्यक्ष केपी शर्मा ओली पक्षधरले मदन भण्डारी फाउन्डेसनको नाममा पार्टी कमिटीलाई प्रभावित पार्नेगरी तल्लोतहसम्म संगठन विस्तार गर्न थालेपछि अर्का अध्यक्ष पुष्पकमल दाहाल प्रचण्ड र माधवकुमार नेपाल पक्षधरहरु पनि तल्ला कमिटीसम्म पुग्न थालेका छन् ।
केही दिनअघि ओली पक्षधर विद्यार्थीहरुको भेला मदन भण्डारी कलेजमा भएको थियो । शुक्रबार प्रचण्ड–नेपाल पक्षधर विद्यार्थीहरुले काठमाडौंमा भेला आयोजना गरेका छन् ।
थापाथलीस्थित इन्जिनियरिङ क्याम्पसमा विद्यार्थीहले भेला गरेका हुन् । विद्यार्थीहरुको भेलालाई नेकपाका स्थायी कमिटी सदस्य र केन्द्रीय नेताहरुले सम्बोधन गरेका छन् । भेलालाई सम्बोधन गर्न पुगेकी स्थायी कमिटी सदस्य अष्टलक्ष्मी शाक्यले संचारकर्मीहरुसँग संक्षिप्त कुराकानी गर्दै शनिबार सचिवालय बैठक बस्नैपर्ने बताइन । प्रधानमन्त्री समेत रहेका अध्यक्ष केपी शर्मा ओलीले बैठकमा भाग लिन्न भन्न नपाउने शाक्यले जिकिर गरिन् । बैठकमा भाग नलिएर ओलीले आफ्नै प्रस्तावलाई अलपत्र पारेको उनले जिकिर गरिन् । उनले भनिन् ‘भोलिको सचिवालयको बैठक हुनै पर्छ । अस्ती अध्यक्ष केपी शर्मा ओलीले सचिवालयको बैठकमा म आउँदिन, म बस्दिन, म छलफलमा भाग लिन्न भनेर भन्नुभयो । प्रचण्डको प्रतिवेदन पनि म मान्दिन भन्नुभयो । यो भन्न उहाँले पाउनुहुन्न । त्यसैले निकास बैठकबाटै हुनुपर्छ । दुईवटा प्रतिवेदन आयो भन्दैमा पार्टी विग्रहमा जान्छ भन्ने मलाई पटक्कै लाग्दैन ।’
शाक्यले अध्यक्ष प्रचण्डले प्रस्तुत गरेको दस्तावेज मान्दिन भन्नेले किन प्रतिउत्तर दिएको भन्दै प्रश्न समेत गरिन । उनले भनिन, ‘दस्तावेज मान्दिन भनेर भनेको हो भने उहाँले प्रतिउत्तर किन दिनुप¥यो । प्रचण्डले पेश गरिसकेपछी जे जे त्यहाँ भित्र छ त्यसको प्रतिउत्तर उहाँले दिइसक्नुभयो । लिखित प्रतिउत्तर दिने अनि छलफलमा भाग नलिने भनेर भाग्न मिल्छ ? बैठक छोडेर जान मिल्छ ? उहाँले समस्याको समाधान कसरी दिन खोजिराख्नु भएको छ कहाँ गएर खोजिराख्नु भएको छ र बाहिरबाट समस्याको समाधान हुँदैन ।’
भेलालाई सम्बोधन गर्न पुगेकी अर्का स्थायी कमिटी सदस्य पम्फा भुसालले पनि संचारकर्मीहरुसँग कुराकानी गर्दै शनिबारको बैठकमा अध्यक्ष ओली उपस्थित हुने विश्वास व्यक्त गरिन । समस्याको समाधान गर्न बैठकमा भाग नलिनेलाई नेतृत्व मान्न नसकिने भुसालले बताइन । भुषालले भनिन्, ‘प्रधानमन्त्री आफैले ३८ पेजको प्रस्ताव पेश गर्नुभएको छ र उहाँसित सम्बन्धित भएर सचिवालयमा अरुले पनि प्रस्ताव राख्नुभएको छ । ती प्रस्तावहरुको छलफलमा सहभागी नबनेर त्यसबाट उम्केर समस्याको हल हुन्न । उहाँ आउनुहुन्छ, आउनुपर्छ र बसेर छलफल गरेर समस्याको सामना गर्नुपर्छ । समस्याको सामना नगर्ने नेतृत्व हुन सक्दैन ।’
भेलालाई दाहाल–नेपाल निकट स्थायी कमिटी सदस्यहरु अष्टलक्ष्मी शाक्य, पम्फा भुसाल, केन्द्रीय सदस्यहरु रामकुमारी झाँक्री, लेखनाथ न्यौपाने, ठाकुर गैह्रे लगायतले सम्बोधन गरेका थिए
प्रतिक्रिया