धनगढी । ओली पक्षमा लागेर प्रदेश सरकार विरुद्ध क्रियाकलप गरेको भन्दै सुदूरपश्चिम प्रदेशका मुख्यमन्त्री त्रिलोचन भट्टले भौतिक पूर्वाधार मन्त्री पठानसिंह बोहोरालाई बर्खास्त गरेको ८ दिनपछि ओली पक्षकै अर्का मन्त्रीले प्रदेश सरकारको मन्त्री पदबाट राजीनामा दिएका छन् ।
सुदूरपश्चिम प्रदेश सरकारका आर्थिक मामिला तथा योजनामन्त्री झपटबहादुर बोहराले आज पदबाट राजीनामा दिएका हुन् ।
पार्टी विभाजनमा दोधारको स्थितिमा रहेका मन्त्री बोहरा पछिल्लो समय नेकपाको ओली पक्षलाई समर्थन गर्ने निश्कर्षमा पुगेका थिए । उनले राजनीतिक कारण देखाउँदै आज राजीनामाको घोषणा गरेका छन् ।
मन्त्री बोहराले पत्रकार सम्मेलन गर्दै राजनीतिक परिस्थितिका कारण काम गर्न असहज बनेको भन्दै राजीनामा दिएका हुन् ।
सुदूरपश्चिम प्रदेश सरकारमा प्रचण्ड–नेपाल पक्षको स्पष्ट बहुमत रहेको छ ।
प्रतिक्रिया