काठमाडौं । जनकपुरमा प्रहरीको कुटाईबाट गम्भीर घाइते भएका प्रचण्ड-नेपाल नेतृत्वको नेपाल कम्युनिष्ट पार्टी नेकपाका नेता रामचन्द्र झासहित चार जना प्रदर्शनकारीलाई काठमाडौं ल्याइएको छ ।
आम हड्ताल सफल बनाउने क्रममा प्रदर्शनमा उत्रिएका नेता रामचन्द्र झासहितको प्रदर्शनकारी र प्रहरीबीच जनकपुरको शिव चोकमा झडप भएको थियो । प्रहरीको लाठी प्रहारबाट टाउकोमा चोट लागेका झाको प्रादेशिक अस्पतालमा उपचार भएको थियो । तर, टाउकोमा गम्भीर चोट लागेका झाको अत्यधिक रक्तश्राव भैरहेपछि जटिल अवस्था हुनसक्ने भएकाले काठमाडौं रिफर गरिएको प्रादेशिक अस्पताल जनकपुरले जनाएको छ ।
झडपमा पूर्वमन्त्री मात्रिकाप्रसाद यादव, शहीद नगरपालिकाका मेयर उदय बरबरिया र प्रदिप साहलाई पनि झासँगै काठमाडौं रिफर गरिएको छ । पूर्वमन्त्री यादवलाई तिघ्रामा अश्रुग्याँसको सेल लागेर चोट लागेको थियो ।
जनकपुरबाट बुद्ध एयरको विमानबाट चारै जनालाई उपचारका लागि काठमाडौं पठाइएको नेकपाले जनाएको छ ।
जनकपुरको शिव चोकमा बिहीबार दिउँसो प्रहरी र प्रदर्शनकारीबीच झडप भएको थियो । त्यसक्रममा प्रदर्शनकारीले ज १ च १५७० नम्बरको मालसमान ढुवानी गर्ने गाडी र ना १ क ५१२ नम्बरको प्रहरीको भ्यानमा तोडफोड गरेका थिए ।
झडपलाई नियन्त्रणमा लिन पनि प्रहरीले लाठीचार्ज र केही सेल अश्रु ग्याँस र दर्जन राउण्ड हवाई फायर प्रहार गरेको थियो ।
प्रतिक्रिया