बझाङमा जिल्ला जनगणना कार्यालय स्थापना

बझाङ । जनगणनाको तयारीका लागि बझाङमा जनगणना कार्यालय स्थापना भएको छ ।

‘मेरो गणना मेरो सहभागिता’ भन्ने नाराका साथ १२ औं जनगणना २०७८ देशभर सञ्चालन हुने भएपछि जनगणना कार्यालय स्थापना भएको हो ।

जिल्लामा जनगणना २०७८ का लागि ३६० जनशक्ति आवश्यक पर्ने भएको छ । जनगणनाका लागि सुपरीवेक्षक र गणक परिचालन गरिने भएको हो । जम्मा ८४ सुपरीवेक्षक र २७६ जना गणक परिचालन हुने तथा जिल्लाको भुगोल अनुसार थप पनि हुन सक्ने जिल्ला जनगणना अधिकारी दिपेन्द्र सिंह धामीले बताए ।

सुपरीवेक्षकका लागि स्नातक र गणकका लागि १२ कक्षा उत्तीर्णले आवेदन दिन पाउनेछन् । अहिले जनगणनाको लागि प्राविधिक तयारी भइरहेको बताए र सुपरीवेक्षकले २०७८ वैशाख २६ देखि जेठ १४ गतेसम्म घरपरिवार सूचीकरण गर्नेछन् ।

गणकले जेठ २५ गतेदेखि असार ८ गतेसम्म गणना गर्नेछन् । यस वर्ष जनगणनामा मुख्य प्रश्नावली ३ वटा र ३७ वटा महल सम्म प्रश्न समावेश गरिने भएको छ । फागुन मसान्तसम्म अनलाइनमार्फत र अनलाइनमार्फत नभरेकाले चैत ५ देखि ११ गतेसम्म कार्यालयमा गएर आवेदन दिन सक्नेछन् ।

जिल्लामा मुख्य कार्यालय गरी ४ ठाउँमा इलाका कार्यालय स्थापना हुने भएको छ । जसमा जिल्ला जनगणना कार्यालय चैनपुर अन्र्तगत जयपृथ्वी नगरपालिका , खप्तडछान्ना , मष्टा ,छविस र सुर्मा गाउँपालिकालार्इ हेर्ने भएको छ । केदारस्युँ गाउँपालिका अन्तर्गत रहेको कार्यालयले केदारस्युँ , र्दुगाथली र थलारा गाउँपालिकालाइ हेर्ने र तलकोट गाउँपालिका अन्तर्गत रहेको जनगणना कार्यालयले तलकोट र साइपाल गाउँपालिका हेर्ने भएको छ ।

यस्तै, बुंगल नगरपालिकामा रहेको कार्यालयले बुंगल नगरपालिका र वित्थडचिर गाउँपालिका हेर्ने भएको छ । जनगणनालाई छिटो, छरितो र विश्वसनीय गराउन वडा तहसम्म विभिन्न समिति निर्माण गरिने भएको छ ।

त्यसका लागि प्रमुख जिल्ला अधिकारीको संयोजकत्वमा जिल्ला जनगणना र समन्वय समितिका प्रमुखको संयोजकत्वमा, उपप्रमुख र जिल्लाभित्रका सबै स्थानीय तहका प्रमुख, उपप्रमुख सदस्य रहने गरी जिल्लास्तरीय जनगणना सहजीकरण संयन्त्र निमार्ण गरिने भएको छ ।

साथै २०७८ को जनगणनामा विगतको प्रश्नावली भन्दा यो जनगणनामा वडामा गएर सुपरीवेक्षकले सामुदायिक प्रश्नावली समेत सोधिने र जसमा वडा ,गाउँटोल नाम , मुख्य र गैर कृर्षि उपज, वडाको राजश्व स्रोत , जातजाती , मातृ भाषा , आर्थिक पुर्वाधार र विपदको अवस्था र वर्षभरि विपदका कारण मृत्यु भएका र वालिनाली क्षेति भएको लगाएतका प्रश्नावलीहरु समेत समेटिएको जिल्ला जनगणना अधिकारी धामीले बताए ।

जनगणनालाइ सफल बनाउनका लागि स्थानीय जनप्रतिनिधि , पत्रकार लगायत आम नागरिकको महत्वपुर्ण भुमिका रहने भएकाले यसमा सहयोग गर्नका लागि समेत सबैमा आग्रह गरेका छन् ।