कार्यकर्तालाई नेपालको आग्रह, – ओलीले कसैको पद खोस्न सक्दैनन्, हिम्मतका साथ सक्रिय बन्नुहोस

काठमाडौं । नेकपा एमालेका वरिष्ठ नेता माधव कुमार नेपालले आफुहरु पार्टी एकताको पक्षमा रहेको स्पष्ट पारेका छन् ।

अखिल नेपाल महिला संघ राष्ट्रिय कार्यकर्ता भेला तथा प्रशिक्षण कार्यक्रमलाई शुक्रबार काठमाडौमा सम्बोधन गर्दै नेता नेपालले आफुहरु पार्टी फुटाउने कल्पना गर्न पनि नसक्ने बताए । नेपालले राष्ट्रिय भेलामा पनि आफुहरुले पार्टी फुटाउने कुरा नगरेको बताउँदै पार्टीलाई सर्वोच्च अदालतको आदेशअनुसार २०७५ जेठ २ गतेको अवस्थामा भने फर्काउनैपर्ने जिकिर गरे ।

नेपालले आफुहरु सधै पार्टी एकताको पक्षमा रहेको बताउँदै अदालतको फैसला अनुसार पुरानै स्थितिमा फर्कनु परेपछि २०७५ जेठ २ गतेको अवस्थामा पार्टीका संबै संरचनालाई यथावत सक्रिय पार्न अध्यक्ष एवं प्रधानमन्त्री केपी ओली तयार नभएको आरोप लगाए । ओलीको अटेरीकै कारण समस्या देखिएको उनले बताए । राष्ट्रिय कार्यकर्ता भेलामा सहभागीलाई कारवाही गर्ने भन्दै ओलीले चेतावनी दिए पनि उनले कसैको पनि पद र जिम्मेवारी खोस्न नसक्ने नेपालले दाबी गरे । नेपालले कार्यकर्ताहरुलाई धैर्यता र हिम्मतका साथ पार्टी एकताको पक्षमा उभिन निर्देशन दिए ।

नेपालले भने, “२०७५ साल जेठ ३ गते दुईवटा पार्टी एकतावद्ध भए । एकतावद्ध हुनुभन्दा पहिले जेठ २ गतेसम्म जुनजुन संरचना थिए, जो जो पदाधिकारी, सदस्य थिए । ती सबैलाई यथावत रुपमा जिम्मा दिनुपर्छ । पार्टी एकतावद्ध भएर अघि बढाउनुपर्छ । तपाईहरु एमाले पार्टीको हुन्जेल कसैले तपाईको पद खोस्न सक्तैन ।”

नेता नेपालले सांसदहरुको सवालमा के कस्तो हुनसक्छ भनेर आफुहरुले परामर्श गरिरहेकाले नआत्तिईकन कम्युनिष्ट एकताको आन्दोलनमा लाग्न पनि निर्देशन दिए ।

चैत ४ र ५ गते सम्पन्न राष्ट्रिय भेलाले एमाले पार्टीमा समानान्तर कमिटी सक्रिय बनाउने निर्णय गरेको थियो । माधव पक्षले विभिन्न जनवर्गीय संगठनहरुका भेला आयोजना गर्न सुरु गरिसकेको छ ।